Жыхарам Віцебска забаронена абмяркоўваць тэракт і размаўляць з журналістамі

На прадпрыемствах Віцебска адміністрацыя праводзіць прафілактычныя гутаркі, каб супрацоўнікі не абмяркоўвалі тэму тэракту і тое, што меркаваныя тэрарысты родам з Віцебска, а тым больш не дзяліліся ніякай інфармацыяй з журналістамі.

Як паведамляе Радыё Свабода, за размовы са "староннімі" пагражаюць нават звальненнем.

Аб строгім папярэджанні не выдаваць ніякай інфармацыі пра затрыманых "выхадцах з Віцебска", якіх абвінавачваюць у менскім тэракце 11 красавіка, крадком распавядаюць жыхары раёна ДСК. Гэта прамысловая ўскраіна, дзе жылі хлопцы - меркаваныя тэрарысты. У сярэдняй школе №35, дзе вучыліся двое з іх, чакаецца маштабная праверка, цішком распавядае маці аднаго з цяперашніх вучняў: "Чакаюць праверкі, ці праводзяцца класныя гадзіны... як наогул вядзецца ідэалагічная праца ў школе... Усе баяцца! Яшчэ настаўніка казалі, быццам маці аднаго з гэтых затрыманых у коме ў бальніцы ляжыць. Рознае людзі кажуць - у транспарце едуць, хто-небудзь скажа, і так чуткі перадаюцца. Вось наш ўчастак №16, участак ЖКГ, дык там усіх таксама трэслі, што парадку ў падвалах няма".

У раёне вуліцы Рэпіна ледзь ці не кожны другі можа паказаць, дзе размешчаны тыя падвалы, у якіх - паводле інфармацыі беларускага тэлебачання - былі лабараторыі па вырабе выбуховых рэчываў. Прыбіральніц, якія мятуць у дварах, прымусілі наводзіць там парадак - выносіць друз і смецце. Ананімна і не на дыктафон яны прызналіся, што друзу і смецця было шмат, а вось прыкмет лабараторыі ніхто не заўважыў. Ды і не пусцілі б туды, калі б там было небяспечна, перакананыя супрацоўніцы ЖЭУ №16.

Пытаюся ў пенсіянеркі ля пад'езду, ці не страшна жыць, калі ўнізе - верагодная "лабараторыя" з выбухоўкай. Тая адказвае неахвотна, але з відавочным недаверам да інфармацыі тэлебачання: "Людзям жа трэба было нешта сказаць. Вось яны і кажуць. Ну, можа, усё забралі, калі там нешта было. А можа, і жылі з гэтым, і ніхто нічога не ведаў!".

Жанчына кажа, што сваім "сутарэньчыкам" у агульным падвале карыстаецца рэдка, але згаджаецца адкрыць і паказаць, як там усё выглядае. Нічога асаблівага: неахайна зроблены перагародкі, драўляныя самаробныя дзверы, цэментавая падлога. У доме, дзе жыве другі затрыманы, падвалы выглядаюць яшчэ горш: няма святла, вільгаць і смурод.

Пры гэтым падвалы не апячатаныя, а ў пад'езд можа зайсці хто заўгодна, хоць некалькі дзён таму там дзяжурылі міліцыянты - нібыта дзеля бяспекі, каб над сваякамі рабят не зладзілі самасуду. Зараз міліцыі не відаць, але і сваякоў таксама: суседзі лічаць, што іх ці то адмыслова вывезлі, каб захаваць таямніцу следства, ці то яны самі часова з'ехалі, каб нікому не трапляцца на вочы.

Тым часам у Інтэрнэце з'явіліся звесткі аб трэцім затрыманым па справе 11 красавіка, які таксама жыў у Віцебску. Хтосьці з мясцовых жыхароў называе імя затрыманага, а хтосьці распавядае, што ён на пару гадоў малодшы за двух затрыманых раней, але паспеў ужо ажаніцца, і жонка цяпер чакае дзіця. Трэці затрыманы нібыта толькі дапамагаў вырабляць выбухоўку, і затрымалі яго дзень ці два таму. Пазней, чым "непрыкметнага хлопца, які нічым не запомніўся суседзям" і "таленавітага хіміка, які ў школе вучыўся на тройкі, а ў сацыяльных сетках рэгістраваўся пад прозвішчам героя серыяла "Салдаты" - такім чынам у СМІ характарызуюць меркаваных вінаватых у здзяйсненні тэракту.

З журналістамі жыхары Віцебска размаўляюць ўсё менш ахвотна: пагрозы з нагоды непрыемнасцяў на працы дзейнічаюць. Афіцыйных звестак пра затрыманых практычна няма: КДБ і пракуратура паведамленні ў Інтэрнэце не каментуюць і канкрэтных прозвішчаў не называюць. Усю інфармацыю абяцаюць агучыць у бліжэйшы час, да моманту прад'яўлення абвінавачвання. У адпаведнасці з заканадаўствам, абвінавачванне павіннае быць прад'яўленае ў 10-дзённы тэрмін, то бок ужо заўтра.