Ева Някляева: Ён трымаецца, не скардзіцца
16- 22.04.2011, 12:55
Ева Някляева жыве чаканнем судовага працэсу над бацькам, кандыдатам у прэзідэнты Уладзімірам Някляевым.
Ужо вядома, што справа Уладзіміра Някляева, якога абвінавачваюць у "арганізацыі і падрыхтоўцы дзеянняў, якія груба парушаюць грамадзкі парадак, альбо актыўным удзеле ў іх", перададзеная ў суд Фрунзенскага раёна Менска, хоць дата працэсу пакуль не прызначаная, паведамляе сайт "Гавары праўду".
А вось працэс над Андрэем Саннікавым пачнецца 27 красавіка ў судзе Партызанскага раёна - Ева перажывае і за яго.
Уладзімір Някляеў збіты нявызначанымі спецслужбамі 19 снежня 2010 года яшчэ ў статусе кандыдата ў прэзідэнты. Але да гэтага часу палітыку не дазволілі прайсці поўнае медыцынскае абследаванне - на суд палітыка павядуць пад канвоем і хворым.
- Раз'юшвае страшна, што бацьку так і не далі магчымасці абследавацца пасля падзеяў 19 снежня, ён ездзіў у КДБ чытаць незлічоныя тамы сваёй "справы" з моцным галаўным болем, болі зараз практычна не праходзяць, - распавядае Ева Някляева. - Мы так дагэтуль і не ведаем, ці гэта наступствы збіцця ці гіпертанічных крызаў (за час утрымання ў СІЗА КДБ Уладзімер Някляеў перанёс 4 гіпертанічных крызы).
- А як жа са зваротамі з нагоды поўнага медыцынскага абследавання - не адказваюць або не дазваляюць?
- Не рэагуюць на хадайніцтва. Перасылаюць з адной інстанцыі ў іншую. Здаецца, усё "па законе", яны павінныя на працягу месяца адрэагаваць на зварот. Яны і рэагуюць, кшталту: "азнаёміліся, перадалі ў належную інстанцыю". І так праходзіць месяц за месяцам. Але калі тату стала зусім блага, то прапусцілі "хуткую". З іншага боку, на гэта ўсё неяк няёмка скардзіцца пасля тэракту.
- Як "звычайна" бацька ваш адчувае сябе ў апошні час?
- Болі, перапады ціску. Але ён трымаецца, не скардзіцца і нешта нават прымудраецца пісаць, нягледзячы на ўсё гэта.
- Жонцы апошнія месяцы таксама даліся нялёгка...
- Ну яшчэ б: жыць увесь час з нейкімі мужыкамі разам у двухпакаёвай кватэры!.. Нервы не вытрымліваюць. Ну і ўявіце сабе: яна стала чакае, калі яго ў яе забяруць. Для любячай жонкі гэта вельмі пакутліва ўсё.
