ЕБРР: Адныя крэдыты Беларусі не дапамогуць
6- 20.05.2011, 11:57
Галоўны эканаміст ЕБРР Эрык Берглоф сумняецца, што СНД і Расея змогуць аказаць дастатковую фінансавую падтрымку Беларусі для вырашэння ейных праблем.
«Мы, вядома ж, уважліва назіраем за тым, што адбываецца ў Беларусі. Цалкам відавочна, што там будуць істотныя патрэбы ў сродках з-за мяжы, звонку. Перад тым як прыйсці сюды, я даведаўся пра тое, што СНД і Расея абяцалі прадаставіць частку такога фінансавання. Не ведаю, ці дастаткова будзе такіх сродкаў для Беларусі», - сказаў Берглоф на прэс-канферэнцыі ў пятніцу ў Астане ў межах штогадовага паседжання Савета кіраўнікоў ЕБРР, перадае РІА «Новости».
На ягоную думку, краіне неабходныя прынцыповыя рэформы. «Беларусь пацярпела ад крызісу і ёй патрэбныя дадатковыя сродкі для развіцця эканомікі. Але было б ілюзорным лічыць, што ўліванне дадатковых сродкаў у эканоміку Беларусі зменіць ейныя фундаментальныя праблемы», - мяркуе ён.
«Трэба прынцыпова мяняць падыход да эканомікі і ўносіць змены ў палітычную сістэму. Там ёсць сур'ёзныя праблемы», - сказаў на заканчэнне галоўны эканаміст ЕБРР.
