Беларусь падвысіла экспартныя пошліны на нафту і нафтапрадукты

Беларусь падвысіла стаўкі экспартных пошлін на нафту і нафтапрадукты, якія вывозяцца з тэрыторыі краіны за межы мытнай тэрыторыі Мытнага саюза.

Гэтае рашэнне згодна з пастановай Савета Міністраў ад 29 красавіка 2011 г. №557 ўступіла ў сілу з 1 мая, паведамілі БелТА ў прэс-службе беларускага ўрада.

Стаўка вывазной мытнай пошліны на 1 т сырой нафты, уключаючы нафту сырую, якая здабываецца на Ванкорскім нафтагазакандэнсатным радовішчы, з 1 мая бягучага года павысілася з $423,7 за 1 т да $453,7 за 1 т. На нафту з утрыманнем серы, за выключэннем нафты сырой, якая здабываецца на Ванкорскім нафтагазакандэнсатным радовішчы, экспартная пошліна склала з 1 мая $211,7. На светлыя нафтапрадукты (лёгкія дыстыляты, сярэднія дыстыляты, газойлі) усталяваная пошліна $304 за 1 т. Пошліна на цёмныя нафтапрадукты (вадкія палівы, маслы, адпрацаваныя нафтапрадукты) склала $211,8, на прапан, бутаны, этылен, прапілен, бутылен і бутадыен, іншыя звадкаваныя газы - $130,2, бензіны таварныя - $408,3, нафтавы вазелін, мінеральныя воскі і аналагічныя прадукты - $211,8. Акрамя таго, стаўка вывазной мытнай пошліны за 1 т нафтавага коксу і бітуму, іншых рэшты ад перапрацоўкі нафты або нафтапрадуктаў, атрыманых з бітумінозных парод, роўная $211,8, бензолу, талуолу, ксілолаў - $ 304.

Як паведамлялася, Беларусь з 1 студзеня 2011 года мае права атрымліваць расейскую нафту і нафтапрадукты без пошлін і без абмежавання аб'ёмаў. Пры гэтым пошліна ад экспарту беларускай сырой нафты паступае ў бюджэт Рэспублiкi Беларусь, а пошліна ад экспарту нафтапрадуктаў - у бюджэт Расейскай Федэрацыі.