Гары Паганяйла: Ад хворага чалавека можна чакаць усяго

Лукашэнка баіцца любога публічнага выказвання незадаволенасці людзьмі.

Беларускі дыктатар прыгразіў «шарахнуць» па ўсіх, хто вырашыць баставаць. «У нас «свядомыя» ў Менску, у сацыяльных сетках, Інтэрнэце заклікаюць да страйку. Я так буду глядзець, назіраць, а потым як шарахну, што не паспеюць за мяжу перабегчы», - заявіў Лукашэнка, наведваючы 14 чэрвеня адно з сельгаспрадпрыемстваў Менскай вобласці.

«Гэта сапраўдная пагроза. Лукашэнка баіцца любога публічнага выказвання незадаволенасці людзей, таму ад гэтага чалавека можна чакаць усяго. Да таго ж трэба ўлічваць, што мы маем справу з хворым чалавекам», - заявіў праваабаронца Гары Паганяйла ў інтэрв'ю «Белсат». Ён нагадаў, што Лукашэнка і сам заяўляў, што, каб захаваць уладу, гатовы ўжыць сілу, у тым ліку і войска, то бок праліць кроў.

Кіраўнік юрыдычнай камісіі Беларускага Хельсінкскага камітэта Гары Паганяйла звяртае ўвагу на тое, што Канстытуцыя Беларусі гарантуе грамадзянам права на правядзенне мірных акцый і сходаў. «Удзельнічаць у іх - неад'емнае права ўсіх, хто не згодзен з урадам. Таму калі незадаволеныя людзі выходзяць на плошчу і гэты пратэст носіць мірны характар ​​- ён не павінен разганяцца з выкарыстаннем сілы. Гэта прамое парушэнне не толькі беларускіх законаў, але і тых міжнародных абавязацельстваў, якія падпісала нашая краіна», - кажа Гары Паганяйла.