Крамы адмаўляюцца ад дарагога імпартнага тавару

Многія крамы Менска вымушаныя адмаўляцца ад дарагога тавару, каб засцерагчы сябе ад папрокаў у неабгрунтавана завышаных коштах.

Бо нягледзячы на ​​нядаўняе зніжэнне гандлёвых надбавак на 10-25% на цэлы шэраг тавараў (каля 100 найменняў), кошты на імпартную прадукцыю па-ранейшаму шакуюць пакупнікоў.

Так, за май кошты на каву выраслі на 60-100%. Напрыклад, 50-грамовы слоічак кавы Tchibo можна купіць за 20 тыс. рублёў. Слоікі вагой 100 грам і 250 грам каштуюць адпаведна 40 тыс. рублёў і 65 тыс. рублёў. Кошт на каву папулярнай маркі Nescafe gold вагой 190 грам наогул вырас да 90 тыс. рублёў. Кошты на гарбату за май выраслі ў сярэднім на 6-7 тыс. рублёў, перадае «Тэлеграф».

Істотна падаражэла таксама імпартнае піва. Напрыклад, бутэлька расейскага піва Tuborg каштуе 5,9 тыс. рублёў, бутэлька «Клінскага» - 5,1 тыс. рублёў.

Пачак чыпсаў Lay's у 80 грам, які раней каштаваў каля 4,4 тыс. рублёў, сёння каштуе ўжо больш за 5,5 тыс. рублёў, кошт пачку ў 100 грам перавышае 10 тыс. рублёў.

Кошт садавіны і агародніны таксама істотна вырасл. Да прыкладу, кілаграм бананаў у крамах Менска ўжо каштуе амаль 12 тыс. рублёў, а кілаграм бульбы - 14 тыс. рублёў.

«У нас ідзе замяшчэнне тавару больш дарагога на больш танны, але не значыць, што няякасны», - паведаміла намеснік начальніка таварнага аддзела універсама «Сухараўскі» Валянціна Рудкоўская.

Кошты на нехарчовыя тавары таксама значна выраслі. Лядоўні купіць сёння можна ўжо па 10 млн рублёў, мікрахвалёўкі - па 4 млн рублёў. Рэкорды б'юць кошты на туалетную паперу - за чатыры рулоны трэба аддаць 17 тыс. рублёў. Пяць кілаграмаў парашку «Арыель» цяпер каштуе 90 тыс. рублёў.