Эмісійныя грошы будуць раздаваць праз «Банк развіцця»

Аляксандр Лукашэнка 21 чэрвеня падпісаў указ № 261 «Аб стварэнні адкрытага акцыянернага таварыства «Банк развіцця Рэспублікі Беларусь».

У цяперашні час фінансаванне дзяржаўных праграм ажыццяўляецца ў асноўным двума буйнымі дзяржбанкамі - «Беларусбанк» і «Белаграпрамбанк». «Стварэнне новай банкаўскай структуры прадугледжвае змяненне сістэмы фінансавання дзяржпраграм, зацверджаных прэзідэнтам Беларусі альбо урадам», гаворыцца ў прэс-рэлізе.

У прэс-службе прэзідэнта спадзяюцца, што «стварэнне Банка развіцця і ўвядзенне механізму спецыяльнага інвеставання дадуць магчымасць павысіць эфектыўнасць выканання праектаў, уключаных у дзяржаўныя праграмы, скараціць тэрміны іх рэалізацыі і акупнасці выдаткаў». «Крэдытаванне праектаў будзе ажыццяўляцца Банкам развіцця ў парадку, вызначаным урадам. Пры гэтым ствараецца структура не будзе абслугоўваць фізічных асоб», удакладнілі ў прэс-службе.

Варта нагадаць, што стварэнне Банка развіцця, якому ад камерцыйных банкаў перайшло б права фінансавання дзяржпраграм, было адной з умоваў вылучэння першых крэдытаў МВФ Беларусі ў 2009-2010 гг. Аднак беларускія ўлады пасля атрымання 3,5 млрд даляраў адклалі гэтае абяцанне ў доўгую скрыню, піша TUT.by.

Зараз гаворка ідзе аб новай праграме з МВФ. Кіраўнік місіі МВФ па Беларусі Крыс Джарвіс на мінулым тыдні даў зразумець, што аднаўленне перамоваў па новым крэдыце магчымае толькі з пачаткам правядзення рэальных структурных рэформаў. У ліку пераўтварэнняў ён як раз і назваў стварэнне Банка развіцця, які будзе прадастаўляць новыя крэдыты ў межах дзяржпраграм.

Таксама варта адзначыць, што стварэнне Банка развіцця было адной з умоваў вылучэння крэдыту з Антыкрызіснага фонду ЕўрАзЭС, першы транш якога Беларусь атрымала ўчора.