ДАІ пагражае выявіць удзельнікаў акцыі «Стоп-бензін»

Дзеянні ўладаў традыцыйныя - запалохаць людзей усімі магчымымі спосабамі.

Парушальнікаў ПДР сярод удзельнікаў несанкцыянаванай акцыі супраць павышэння рознічных коштаў на нафтапрадукты, якая прайшла 7 чэрвеня ў Менску, ДАІ выявіць па нумарных знаках, паведаміла interfax.by начальнік прэс-службы УДАІ ГУУС Менгарвыканкама Жана Трайно.

«Тое, што адбывалася на праспекце Незалежнасці фіксавалася на відэакамеру супрацоўнікамі ДАІ. Парушальнікі Правілаў дарожнага руху будуць выяўляцца па нумарных знакам. Іхнім дзеянням будзе дадзеная прававая адзнака», - распавяла Ж. Трайно.

Дзяржаўтаінспекцыя будзе ацэньваць толькі тыя дзеянні ўдзельнікаў несанкцыянаванай акцыі, якія былі ў парушэнне ПДР, падкрэсліла начальнік прэс-службы ДАІ беларускай сталіцы.

На пытанне карэспандэнта аб тым, якім чынам супрацоўнікі ДАІ будуць правяраць, ці сапраўды прычынай спынення аўтамабіля на праезнай часткі ў кожным канкрэтным выпадку стала паломка альбо аўтаўладальнік зрабіў гэта з мэтай стварыць затор на дарозе, Ж. Трайно паведаміла, што «існуюць аператыўныя меры, якія дазваляюць гэта зрабіць».

Як паведамлялася, у ходзе акцыі на праспекце Незалежнасці ў цэнтры Менска ў аўторак быў цалкам перакрыты для руху адзін бок праспекта. Арганізатары разлічвалі прыцягнуць увагу як як мага большых слаёў грамадскасці і ўрада да росту коштаў на паліва і зніжэнне ўзроўню прыбыткаў.

7 чэрвеня канцэрн «Белнафтахім» павысіў адпускныя рознічныя кошты на нафтапрадукты ў сярэднім на 31%, давёўшы іхні кошт да аднаго даляра ў эквіваленце за адзін літр паліва. Папярэдняе падвышэнне коштаў адбылося 24 мая. Такім чынам, за два тыдні кошты на аўтамабільнае паліва выраслі сумарна амаль на 50%.