Лісты Статкевіча не даходзяць да Менска

Лісты кандыдата ў прэзідэнты Мікалая Статкевіча са шклоўскай калёніі не даходзяць да Менска.

Пра гэта БелаПАН паведаміла ягоная грамадзянская жонка Марына Адамовіч.

Па ейных словах, за месяц знаходжання ў калоніі ад Мікалая Статкевіча яна атрымала ўсяго тры лісты; апошні - 30 чэрвеня, два тыдні таму. 7 ліпеня грамадзянскі муж тэлефанаваў, распавёў графік дазволеных тэлефанаванняў на гэты месяц, але 11 ліпеня чарговага тэлефанавання ўжо не было.

Які стан Статкевіча, Марына Адамовіч не ведае. Датэлефанавацца да начальніка калоніі ў яе не атрымліваецца, а ў адміністрацыі якую-небудзь інфармацыю аб асуджаным паведамляць адмаўляюцца.

Цяпер вядома, што Мікалая Статкевіча не будзе на разглядзе 19 ліпеня ў Менскім гарадскім судзе ягонай касацыйнай скаргі на вынесены прысуд.