Рэгіянальны рэкорд: як мінімум 120 затрыманых у Гродне

Праваабаронцы кажуць, што лічба можа быць большай.

Як паведаміў «Нашай Ніве» гарадзенскі праваабаронца Віктар Сазонаў, на 14.00 сёння былі прызначаныя першыя суды над удзельнікамі маўклівай акцыі 3 ліпеня. Па ягоных словах, толькі на гэты час выклікалі 69 чалавек. Таксама было паседжанне суда ў 15.00. Таму цалкам пацвярджаецца інфармацыя, што ў Гродне затрымалі 120 чалавек.

Віктар Сазонаў адзначыў, што сёння ніхто не быў асуджаны. Тым, каго выклікалі, без тлумачэння прычын ўручылі позвы на 6 ліпеня.

Разам з тым застаецца невядомы лёс тых затрыманых, якія правялі ноч у ізалятары. Сярод іх і журналіст тэлеканала «Белсат» Юрый Гумянюк. Праваабаронца не выключае, што іх асудзілі ў ходзе выязнога суда. І цяпер тыя людзі засталіся адбываць адміністрацыйны арышт. Але ён падкрэсліў, што праверыць такую ​​інфармацыю пакуль не атрымалася.

Удзел у маўклівай акцыі пратэсту 3 ліпеня ў Гродне прынялі некалькі сотняў чалавек. Праваабаронцы прыводзяць лічбу ў мінімум 380 затрыманых па ўсёй краіне.

Канстытуцыя Беларусі гарантуе свабоду сходаў і словы, але на практыцы гэтыя правы чалавека не выконваюцца.