Пенсіі з 1 жніўня павялічацца ў сярэднім на 13%

У жніўні ў Беларусі павышаюцца працоўныя і сацыяльныя пенсіі.

Згодна з указам прэзідэнта № 327 ад 26 ліпеня пераразлік працоўных пенсій будзе зроблены, зыходзячы з сярэдняй заработнай платы працаўнікоў за другі квартал 2011 года. У выніку пенсіі павялічацца ў сярэднім на 13% - з 669 да 757 тыс. рублёў, паведамляе БелаПАН.

У жніўні павялічацца і памеры сацыяльных пенсій. Для інвалідаў I групы (у тым ліку інвалідаў з дзяцінства) яны ўзрастуць з 85 да 100% бюджэту пражытачнага мінімуму (з 1 мая БПМ складае 343 тыс. 260 рублёў); інвалідаў з дзяцінства II групы - з 75 да 95% БПМ; інвалідаў II групы і дзяцей у выпадку страты карміцеля - з 65 да 85% БПМ; інвалідаў III групы (у тым ліку інвалідаў з дзяцінства) - з 55 да 75% БПМ.

Сацыяльныя пенсіі для дзяцей-інвалідаў да 18 гадоў вырастуць: пры першай ступені страты здароўя - з 60 да 80% БПМ, другой - з 65 да 85% БПМ, трэцяй - з 75 да 95% БПМ, чацвёртай - з 85 да 110% БПМ .

Пераразлік працоўных і сацыяльных пенсій, згодна з указам, павінен быць здзейснены таксама ў лістападзе бягучага года. Ён будзе здзяйсняцца, зыходзячы з сярэдняга заробку працаўнікоў па выніках трэцяга квартала. У выніку пенсіі павінныя павялічыцца ў сярэднім на 7,9% - з 757 да 817 тыс. рублёў.

Паводле інфармацыі прэс-службы прэзідэнта, штомесячныя дадатковыя выдаткі на выплату працоўных і сацыяльных пенсій з 1 жніўня складуць 220,6 млрд. рублёў, з 1 лістапада - 370,6 млрд. рублёў. У цэлым для рэалізацыі названых мер спатрэбіцца 1,4 трлн. рублёў. Фонд сацыяльнай абароны насельніцтва Мінпрацы і сацабароны размяшчае фінансавымі сродкамі ў неабходным аб'ёме, падкрэслівае прэс-служба.