Вольга Бандарэнка: Зміцер рады ўсім, хто выходзіць на волю

Жонка палітвязня Зміцера Бандарэнкі кажа, што каардынатар «Еўрапейскай Беларусі» прасіць памілавання не будзе, але не асуджае тых, хто гэта зрабіў.

Па словах Вольгі Бандарэнка, яна сустракалася са Зміцерам у шпіталі ў сераду (нагадаем, раней яму рабілі складаную аперацыю на хрыбетніку). У гутарцы закраналася і тэма напісання просьбы аб памілаванні. Зміцер сказаў, што, вядома, нічога пісаць не будзе. «Муж рады ўсім, хто выходзіць на волю. Нікога не асуджае, але сам ён пісаць не будзе», - кажа Вольга.

Вольга Бандарэнка прызналася «Еўрарадыё», што перад аперацыяй Зміцера ў яе ўзнікла думка напісаць просьбу аб памілаванні «ад пачуцця безвыходнасці».

Вольга Бандарэнка лічыць, што вызваленне Зміцера без напісання просьбы аб памілаванні было б выгадным уладам. «Тым больш, 20-га жніўня ў яго траціну тэрміну, і ён можа пісаць заяву на змену рэжыму», - кажа жонка палітвязня.