Беларусь запрасіла ў Чэхіі банкаўскую інфармацыю НУА

Прадстаўніцу «Нашага дома» Вольгу Карач нават дапыталі ў чэшскім Фінансавым камітэце.

Але крыніца ў Празе запэўніла «Еўрарадыё», што сур'ёзную інфармацыю Менску не перадавалі.

На зарэгістраваную арганізацыю Міжнародны Цэнтр грамадзянскіх ініцыятываў «Наш Дом» Беларусь пасылала запыт Чэхіі яшчэ да прэзідэнцкіх выбараў. У верасні 2010 года прадстаўніца арганізацыі Вольга Карач была на допыце ў Фінансавым камітэце Прагі.

«Я тлумачыла, што не маю банкаўскіх рахункаў. І што гэты запыт - па палітычнаму нагоды », - распавяла Карач.

Прыватных рахункаў у Чэхіі ў Вольгі няма, але Беларусь зацікавіў рахунак арганізацыі.

У гэтым чэрвені Вользе прыйшоў ліст з беларускага падатковай інспекцыі даць тлумачэнні па факце «прыбыткаў з-за мяжы». Паколькі ў Беларусі яна будзе толькі ў верасні, то дамовілася сустрэцца з падаткавай увосень. Толькі тады і стане вядомая прычына выкліку, кажа Вольга Карач.

Цалкам верагодна, што гэта звязана з тым самым запытам у Чэхію.

Крыніца ў Празе запэўніла, што «важнай інфармацыі на Бяляцкага і іншых актывістаў Чэхія беларускім уладам не перадавала, прынятыя ўсе меры, каб не дапусціць сітуацыі, падобнай да літоўскай і польскай».

Некалькі месяцаў таму адпаведныя дзяржаўныя органы Чэхіі правялі сустрэчы, каб абмеркаваць недапушчэнне перадачы інфармацыі аб дэмакратычных актывістах беларускім уладам, кажа Катаржына Шпацава, выканаўчая дырэктарка арганізацыі «Грамадзянская Беларусь».

«Магу запэўніць, што дзяржаўныя органы Чэхіі не перададуць Беларусі інфармацыю аб банкаўскіх рахунках дэмакратычных актывістаў, бо падобная інфармацыя можа быць выкарыстаная для пераследу людзей», - паведаміла дырэктарка «Грамадзянскай Беларусі».