Палітвязень Мікіта Ліхавід: «Квіткоў на цягнік для мяне няма»

Маці палітвязня Алена Ліхавід распавяла пра апошнія атрыманыя лісты ад сына.

Маці палітвязня адзначыла, што ў сваіх лістах Мікіта пра турму нічога не піша. Магчыма, таму што разумее: такія лісты не прапусціць цэнзура. У сваім хуткім вызваленні Мікіта Ліхавід сумняецца.

«У гэтым лісце ён чарговы раз піша, каб я не хвалявалася, што са здароўем у яго ўсё ў парадку, што ён трымаецца. Таксама ў гэты дзень прыйшоў ліст ягонаму лепшаму сябру, у якім напісана, што, «на жаль, квіткоў на цягнік для яго няма, і магчыма, што ён атрымае квіток у апошні вагон». Тут усё зразумела: аб памілаванні ён пісаць не будзе і да яго ніхто не звяртаецца. Ён выдатна разумее, што калі будуць вызваляць, то яго ў апошнюю чаргу, у апошнім вагоне, як гаворыцца», - распавяла жанчына «Еўрарадыё».

Па словах маці палітвязня, Мікіта у сваім лісце пацвердзіў інфармацыю, што яго пазбавілі ўсіх спатканняў. Пакінулі толькі адно кароткае спатканне з маці, але Алена Ліхавід не ведае, калі яна зможа яго выкарыстаць.

Нагадаем, Ліхавід быў асуджаны за ўдзел у Плошчы на ​​3,5 гады калоніі ўзмоцненага рэжыму. У наваполацкай калоніі ён адмаўляецца выконваць загады адміністрацыі, за што дзясяткі сутак правёў у карцэры.