Зміцер Дашкевіч: «Жыўцом нас ніхто не возьме»

25 жніўня сустаршыня аргкамітэту Беларускай Хрысціянскай Дэмакратыі Аляксей Шэін атрымаў ліст ад палітвязня, лідэра «Маладога фронту» Зміцера Дашкевіча.

Ліст датаваны 22 жніўня. Зараз Зміцер Дашкевіч знаходзіцца ў ПКТ - «памяшканні камернага тыпу», куды ён трапіў пасля турэмнага карцэра. У адрозненне ад карцэра, цяпер Дашкевіч можа атрымліваць карэспандэнцыю і пісаць лісты, паведамляе «Радыё Свабода».

«Сам я тут - як у казцы!:) Калі-небудзь распавяду:) Хвалявацца за мяне не прыходзіцца - усё пад кантролем!:) Жыўцом нас ніхто не возьме:)», - піша Зміцер Дашкевіч, прычым пасля кожнага сказу ў лісце намаляваны смайлік.

Заканчваецца ліст словамі з Бібліі: «Хто са слязмі сеяў, пажне з радасцю» (Пс. 125:5).

Аляксей Шэін, які добра ведае Дашкевіча, выказаў меркаванне, што, мяркуючы па стылі і манеры ліста, відавочна, што Зміцеру цяпер вельмі складана, хоць ён гэтага і не кажа адкрыта.

«Сяброў-маладафронтаўцаў вельмі трывожыць сітуацыя з Дашкевічам і іншымі палітвязнямі. 30 жніўня ў 12 гадзін у Менску адбудзецца надзвычайная прэс-канферэнцыя, якую будзе праводзіць Малады фронт», - паведаміў Аляксей Шэін.