Збітага апазіцыянера арыштавалі на 15 сутак

Канстанціна Жукоўскага затрымалі 21 верасня напярэдадні маўклівай акцыі пратэсту ў Гомелі.

22 верасня суддзя суду Цэнтральнага раёна Гомеля Марына Дамненка прызнала апазіцыянера Канстанціна Жукоўскага вінаватым у здзяйсненні правапарушэнняў, прадугледжаных артыкуламі 17.1 і 23.4 КаАП (нецэнзурная лаянка ў грамадскім месцы і непадпарадкаванне патрабаванням супрацоўнікаў міліцыі).

Па рашэнні суда 15 сутак апазіцыянер правядзе ў ІЧУ, перадае БелаПАН.

Нагадаем, Жукоўскі быў затрыманы ўвечары 21 верасня. На скрыжаванні вуліц Кніжнай і Тэльмана на яго раптам накінуліся супрацоўнікі спецназа і з ужываннем грубай фізічнай сілы зацягнулі ў службовы аўтамабіль. Верагодна, актывіст атрымаў пры гэтым траўмы, бо ўначы яго павезлі ў абласную лякарню. Мінулую ноч ён правёў у ІЧУ.

Паводле міліцэйскага пратаколу, Жукоўскі 21 верасня прыкладна ў 18.25 на вуліцы Тэльмана нецэнзурна лаяўся, на заўвагі міліцыянтаў не рэагаваў, а пры спробе спыніць супрацьпраўныя дзеянні аказаў непадпарадкаванне міліцыі.

Супрацоўнікі палка міліцыі спецыяльнага прызначэння Сяргей Мітчанка, Андрэй Юранаў і Аляксандр Мядзведзеў паказалі на судзе, што 21 верасня прыкладна з 17.00 па загадзе начальніка аддзела грамадскага парадку Чыгуначнага РАУС маёра Аляксандра Кошмана чакалі Жукоўскага ў яго дома, каб уручыць яму позву. Па словах міліцыянтаў, яны сустрэлі актывіста на вуліцы Тэльмана, спрабавалі ўручыць позву, але Жукоўскі пачаў лаяцца матам, аказаў ім супраціў, сарваў з міліцыянтаў бэджы і рацыі.

Па словах міліцыянтаў, апазіцыянер паводзіў сябе неадэкватна. «Ён пагражаў нам, нашым сем'ям, усё казаў пра нейкія ілюстрацыі», - заявіў у судзе Сяргей Мітчанка.

Актывіст не прызнаў, што лаяўся матам і не падпарадкоўваўся міліцыянтам.