Free Belarus Now заклікае да байкоту «эмісараў апошняй дыктатуры Еўропы»

Кампанія Free Belarus Now! выступіла з заявай адносна палітыкі Еўразвяза ў дачыненні да беларускага рэжыму.

«Кандыдат у прэзідэнты Андрэй Саннікаў знік падчас этапавання ў калонію ў Бабруйску. Ягонае цяперашняе месцазнаходжанне невядомае.

Саннікава перавялі без папярэдняга папярэджання з наваполацкай калоніі 20 верасня, і з тых часоў яго не бачылі. Адвакатка кандыдата ў прэзідэнты даведалася аб пераводзе толькі 21 верасня, калі яна патэлефанавала ў калонію з просьбай аб наведванні. Калі яна папрасіла аб магчымасці сустрэцца з Саннікавым ў Бабруйску, ёй сказалі, што ён яшчэ не прыбыў, і што яго чакаюць там не раней за вечар 24 верасня.

Зміцер Дашкевіч, лідэр «Маладога Фронту», моладзевай дэмакратычнай арганізацыі, таксама знік. Ідзе адзінаццаты дзень галадоўкі Дашкевіча. Ён пратэстуе супраць неналежнага абыходжання з ім персаналу турмы. У яго слабое здароўе, і перавод падвяргае яго непатрэбнай рызыцы.

Мяркуючы па нядаўніх паведамленнях іншых палітвязняў аб ўзмоцненым ціску, які на іх аказваюць з мэтай прымусіць іх падпісаць прызнанне віны і просьбы аб памілаванні, ёсць сур'ёзныя асцярогі наконт іхняй бяспекі.

Мы патрабуем, каб рэжым Лукашэнкі неадкладна падаў адвакатам Андрэя Саннікава і Зміцера Дашкевіча інфармацыю аб іхнім месцазнаходжанні, і магчымасць сустрэчы з палітвязнямі, каб пераканацца, што з імі ўсё добра.

Гэтыя апошнія падзеі маюць месца за тыдзень да ўдзелу высокапастаўленых прадстаўнікоў Беларусі ў саміце Еўрапейскага партнёрства ў Варшаве.

Нядаўна Лукашэнка абяцаў міністру замежных справаў Балгарыі Мікалаю Младзенаву, што ўсе палітвязні ў Беларусі будуць вызваленыя да канца верасня, і што ўлады ўступяць у дыялог з апазіцыяй. Гэта былі ілжывыя абяцанні. Дзеянні Лукашэнкі яшчэ раз даказваюць, што яму нельга верыць. Лукашэнка працягвае парушаць правы чалавека, у той жа час, даючы абяцанні Еўропе, якія ён не збіраецца выконваць.

Мы задаем пытанне: як еўрапейскія міністры могуць уступаць у дыялог з рэжымам, які праявіў такую абуральную непавагу да правоў сваіх грамадзянаў?

Мы заклікаем усіх удзельнікаў саміту Усходняга парнерства байкатаваць любы дыялог з беларускімі ўдзельнікамі. Мы патрабуем ад іх не ўступаць у кантакты з эмісарамі апошняй дыктатуры Еўропы», - гаворыцца ў заяве.