У адміністрацыі Лукашэнкі зварот «Маладога фронту» не прынялі

29 верасня сябры арганізацыі «Малады фронт» звярнуліся ў адміністрацыю, каб перадаць зварот на імя «грамадзяніна Аляксандра Лукашэнкі».

Вось тэкст звароту:

«Паведамляем вам, што органамі вашай карнай сістэмы ажыццяўляецца беспрэцэдэнтны ціск на нашага сябра Зміцера Дашкевіча. Ведаючы вашую ролю ў тым, што многія палітычна актыўныя грамадзяне апынуліся за кратамі, мы інфармуем вас, што тыя бесчалавечыя ўмовы, якія вы адмыслова ствараеце для вашых апанентаў, не тое што не адпавядаюць сучасным сусветным стандартам, - яны дадаюць негатыўнага рэйтынгу нашай краіне.

Разам з заявай дадаем фота турмаў краін, дзе паважаюць правы сваіх грамадзянаў і не здзекуюцца над імі.

Улічваючы абсалютную відавочнасць абсурднасці абвінавачванняў супраць тых палітвязняў, якія застаюцца за кратамі, мы патрабуем неадкладнага вызвалення і рэабілітацыі наступных палітычных зняволеных:

Зміцер Дашкевіч

Андрэй Саннікаў

Эдуард Лобаў

Мікалай Статкевіч

Зміцер Бандарэнка

Зміцер Ус

Павел Севярынец

Яўген Васьковіч

Мікалай Аўтуховіч

Алесь Бяляцкі

Просім ў адпаведнасці з законам «Аб зваротах грамадзянаў» даслаць адказ у 15-дзённы тэрмін».

Дадзены зварот у адміністрацыі Лукашэнкі прыняць адмовіліся.