Нью-Йоркскі клуб рускіх паэтаў супраць пераследу Пачобута

21 кастрычніка клуб выступіў з адпаведнай заявай.

«Мы, рускамоўныя літаратары Амерыкі, выказваем рашучы пратэст супраць пераследу беларускімі ўладамі журналіста, карэспандэнта польскай «Gazety Wyborczej» Анджэя Пачобута», - гаворыцца ў заяве, тэкст якой атрымала прэс-служба БАЖ.

«Журналісту пагражае пяць гадоў турмы за шэраг публікацый у інтэрнэце. Паводле ацэнак незалежных экспертаў, журналісцкія артыкулы Пачобута не ўтрымліваюць прыкмет паклёпу, але крытыкуюць палітыку беларускіх улад.

Наш пратэст мы давядзем да ведама беларускіх улад і сусветнай грамадскасці праз непасрэдныя звароты да міжнародных структур і публікацыі ў прэсе», - гаворыцца ў заяве.

Сітуацыю з Пачобутам адсочвае таксама Амерыканскі ПЭН-цэнтр (PEN American Center), які аб'ядноўвае каля 3 000 літаратараў. Яшчэ ў ліпені, калі стала вядома пра новую крымінальную справу супраць журналіста, арганізацыя звярталася да Аляксандра Лукашэнкі і генпракурора Аляксандра Канюка з заклікам зняць з Пачобута усе абвінавачванні і выканаць свае абавязацельствы па абароне свабоды выказвання для ўсіх грамадзян. Звароты пратэсту былі накіраваны таксама ў дыпламатычныя прадстаўніцтвы Беларусі ў шэрагу краін.