Расейскія СМІ: Менск падкупляе Маскву прызнаннем Абхазіі і Паўднёвай Асеціі

Да чаго ж «паслядоўная» знешняя палітыка Аляксандра Лукашэнкі, пішуць расейскія выданні.

Варта было краіне сутыкнуцца з нарастаннем крызісу ў эканоміцы на фоне фактычнага байкоту Менска з боку МВФ, варта было Беларусі запазычыцца Расеі $1,5 млрд за рээкспарт у Еўропу нафтапрадуктаў з нафты, якая пастаўляецца Масквой па льготных коштах, з прычыны чаго гэтая «халява» можа скончыцца ўжо з IV квартала г. г., як беларускае кіраўніцтва тут жа намякнула Расеі на гатоўнасць прызнаць Абхазію і Паўднёвую Асецію, чаго Масква ўжо даўным-даўно чакае ад Менска, піша сеткавае выданне km.ru.

Учора кіраўнік МЗС Беларусі Уладзімір Макей не выключыў, што ў будучыні Менск можа вярнуцца да перагляду сваёй пазіцыі аб прызнанні Абхазіі і Паўднёвай Асеціі. «Жыццё не стаіць на месцы, і тэма беларуска-грузінскіх і беларуска-асяцінскіх адносін абмяркоўвалася сёння», - заявіў ён ўчора па выніках сумеснай калегіі міністэрстваў замежных спраў дзвюх краін, якая прайшла ў Менску. «Я не магу сказаць, што наша пазіцыя памянялася, але мы будзем аналізаваць сітуацыю на постсавецкай прасторы і прымем рашэнне па гэтым пытанні, зыходзячы з нашых нацыянальных інтарэсаў», - прыводзіць яго словы «Інтэрфакс».

Нагадаем, што Менск да гэтага часу не прызнаў незалежнасць Абхазіі і Паўднёвай Асеціі, нягледзячы на абяцанне разгледзець гэта пытанне, якое Аляксандр Лукашэнка быццам бы даў Маскве яшчэ ў 2008 годзе. Паводле беларускіх законаў, тлумачыць ІА REGNUM, дадзенае рашэнне ўваходзіць у кампетэнцыю прэзідэнта краіны, аднак Лукашэнка пасля паспрабаваў перакласці цяжар вырашэння пытання на «парламент», які, у сваю чаргу, толькі і рабіў, што глядзеў у рот Лукашэнке. Вось такая пазіцыя па гэтым пытанні да гэтага часу агучвалася Менскам Маскве.

За мінулыя гады Лукашэнка ні разу не павіншаваў кіраўнікоў Абхазіі і Паўднёвай Асеціі з днямі незалежнасці іх краін. Пры гэтым самім лідэрам Абхазіі і Паўднёвай Асеціі, якімі тады былі Сяргей Багапш і Эдуард Какойты, Лукашэнка цвёрда абяцаў прызнанне. «Лукашэнка кажа: «Я сваё слова стрымаю, абавязкова ў бліжэйшы час будзе прызнанне». Мы на пахаванні Аляксія II нефармальна сустракаліся: я, Багапш і Лукашэнка», - распавядаў Какойты ў студзені 2009 года.

Але прызнання ад Менска так і не было. Пазней, 1 кастрычніка 2010 года, Лукашэнка паведаміў журналістам пра бесперспектыўнасць прызнання Абхазіі і Паўднёвай Асеціі, адзначыўшы, што «працягу размова не мае». Пры гэтым Беларусь захавала бязвізавы рэжым з Грузіяй.

Што ж прымусіла Менск заявіць зараз аб магчымасці перагляду сваёй пазіцыі? Аказалася, што пытанне прызнання Абхазіі і Паўднёвай Асеціі - адзін з апошніх (калі не адзіны пакінуты) казыроў Лукашэнкі ва ўзаемаадносінах з Масквой. А тут над Менскам яўна згусцелі хмары.

Урад Расеі, заявіла расейскаму інфармагенцтву «Прайм» крыніца ў органах дзяржкіравання, прапанавала Менску пералічыць у расейскі бюджэт недаатрыманыя сродкі ад экспарту беларускімі прадпрыемствамі растваральнікаў, выпрацаваных з расейскай сыравіны. «Расея прапанавала вярнуць у расейскі бюджэт пошліны, недаатрыманыя ад экспарту з Беларусі растваральнікаў, змазачных матэрыялаў і г. д.», - заявіла крыніца, каментуючы ход перамоў аб пастаўках на беларускія НПЗ расейскай нафты ў IV квартале 2012 года і ў 2013 годзе, якія ішлі на днях у Маскве. Недаатрыманыя расейскім бюджэтам сродкі ад рэалізацыі беларускім бокам «растваральнікавай» схемы ацэньваюцца ў $1,5 млрд.

ІА REGNUM нагадвае ў сувязі з гэтым, што на мінулым тыдні ў перамовах у Маскве прыняў непасрэдны ўдзел першы віцэ-прэм'ер урада Беларусі Уладзімір Сямашка, які курыруе ТЭК Беларусі. З расейскага боку віцэ-прэм'ер Расеі Аркадзь Дварковіч ацаніў тады ход перамоў наступным чынам: «Прадмет перамоў - аб'ёмы паставак нафты ў гэтым і наступным годзе, якія ўмовы для гэтага павінны быць выкананы; перш за ўсё - якім чынам неабходна памяняць нарматыўную базу, каб не паўтараліся тыя праблемы, якія былі ў гэтым годзе па пастаўках так званых растваральнікаў».

І вось, сутыкнуўшыся з такой жорсткай пазіцыяй Масквы, Менск тут жа ўспомніў пра сваю «казырную карту» - пытанні аб прызнанні Абхазіі і Паўднёвай Асеціі. «Беларускі кіраўнік, які фармальна пераклаў пытанне аб прызнанні на плечы «парламента» (няхай, маўляў, народ вырашае), - тлумачыць ІА REGNUM беларускі палітолаг Мікалай Радаў, - сёння заняты пошукам новых інструментаў шантажу Расеі - праўда, пакуль зусім безвынікова. Ды і Крэмль змог у чарговы раз перайграць беларусаў, спачатку даўшы магчымасць займацца кантрабандай, а затым абсалютна легальна прад'явіўшы прэтэнзіі на $1,5 млрд. А гэта - ужо куды больш сур'ёзны аргумент, які не дазваляе Лукашэнку манеўраваць ні ў галіне палітыкі, ні ў вобласці эканомікі. Таму калі Расея запатрабуе ўвасобіць у жыццё даўнія абяцанні беларускага кіраўніка, паабяцаўшы заплюшчыць вочы на пазыкі і кантрабанду, то таму не застанецца нічога іншага, як прызнаць Паўднёвую Асецію і Абхазію. Пры гэтым усё «каханне» з Міхаілам Саакашвілі і «цікавыя» ідэі вяртання Грузіі ў СНД цалкам страцяць дэкларавальную ў апошні час важнасць, таму што на коне будзе стаяць палітычная стабільнасць - адзінае, што сёння застаецца ў беларускіх улад у запасе».

Зрэшты, перакананы Радаў, «у бліжэйшы год ніхто нічога не прызнае (калі ў Аляксандра Лукашэнкі раптам не здарыцца чарговы выкід эндарфіну з раніцы) - гэта больш чым відавочна. Не да таго зараз ні Расеі, ні Беларусі. Дадзенае пытанне будзе выкарыстана абедзвюма бакамі для рознага роду папрокаў і прэтэнзій. Гэта лагічна і чакана».