Спікер Сейма Польшчы: «Наш абавязак - дапамагаць народам, у якіх няма свабоды»

У польскім Сейме адкрылася выстава, прысвечаная пяцігоддзю тэлеканала «Белсат».

У адкрыцці выставы прынялі ўдзел спікер Сейма Эва Копач, старшыня парламенцкай групы па Беларусі Роберт Тышкевіч, дырэктар тэлеканала «Белсат» Агнешка Рамашэўская, дэпутат Сейма і кіраўнік польскай парламенцкай групы пры Парламенцкай асамблеі Савета Еўропы Анджэй Халіцкі, жонка палітвязня Мікалая Статкевіча Марына Адамовіч, былы палітвязень, каардынатар грамадзянскай кампаніі «Еўрапейская Беларусь» Зміцер Бандарэнка, галоўны рэдактар сайта charter97.org Наталля Радзіна, судырэктар Беларускага дома ў Варшаве Зміцер Бародка і Алесь Зарэмбюк і іншыя.

Выступаючы, спікер Сейма адзначыла выключную ролю незалежных СМІ ў фарміраванні дэмакратычнага грамадства ў Беларусі і абавязак свабодных краін падтрымліваць тыя народы, у якіх свабоды пакуль няма.

«У 1960-70-80 гады мы слухалі радыё «Свабодная Еўропа» для Польшчы, і сёння беларусы таксама глядзяць адзіны незалежны беларускі тэлевізійны тэлеканал «Белсат», - сказала Эва Копач і адзначыла, што ганарыцца тым, што тэлеканал працуе ў Польшчы, і вельмі рада, што яго дзейнасць зараз магчымая дзякуючы ўдзелу Швецыі, Канады, ЗША і Еўразвяза.

Роберт Тышкевіч адзначыў, што ўсе парламенцкія фракцыі польскага Сейма падтрымліваюць неабходнасць працы «Белсата» для Беларусі.

Дырэктар тэлеканала Агнешка Рамашэўская заклікала прысутных памятаць пра тых, хто цяпер пакутуе ў Беларусі за жаданне прафесійна выконваць сваю працу і за свае перакананні, перш за ўсё аб палітычных зняволеных.

Спецыяльныя стэнды і мультымедыйныя інсталяцыі распавядаюць аб першым беларускім незалежным тэлеканале, а таксама ілюструюць паўсядзённае жыццё ў нашай краіне.

Экспазіцыя - гэта не толькі сюжэты пра рэпрэсіі і пераслед незалежных журналістаў і работнікаў «Белсата» ў Беларусі, але і найважная інфармацыя аб працы тэлеканала: звесткі аб аўдыторыі, праглядах і праграмах.

На выставе таксама прадстаўленыя дасягненні канала - спіс асноўных узнагарод, атрыманых «Белсатам» і кароткая інфармацыя аб падтрымцы з боку ўрадаў і міжнародных арганізацый.

Выстава фінансуецца з бюджэту канцылярыі Сейма. Аўтарамі выставы з'яўляюцца Матэўш Адамскі і Багуслава Агжэбач, графічны дызайн падрыхтаваны Паўлам Пагодай.

Нагадаем, тэлеканал «Белсат» пачаў вяшчанне 10 снежня 2007 года.