МВФ заслухае справаздачу аб беларускім «цудзе»

Справаздачу місіі МВФ па трэцім постпраграмным маніторынгу эканомікі Беларусі разгледзяць сёння ў Вашынгтоне на пасяджэнні Савета дырэктараў МВФ.

Пра гэта БелаПАН паведамілі ў беларускім офісе фонду.

Трэцяя місія МВФ па постпраграмным маніторынгу пад кіраўніцтвам Дэвіда Хофмана працавала ў Беларусі 18-29 кастрычніка.

На выніковым брыфінгу Хофман заявіў, што ўмоў для адкрыцця новай крэдытнай праграмы МВФ у Беларусі пакуль няма.

«Для перамоў па магчыма новай праграме па-ранейшаму неабходная згода ўсіх службовых асоб, у тым ліку на самым высокім узроўні, адносна ўсёабдымнага пакета мер эканамічнай палітыкі, які атрымае дастатковую падтрымку з боку краін - членаў МВФ», - падкрэсліў кіраўнік місіі.

У МВФ лічаць неабходным, каб такі пакет мер прадугледжваў паслядоўную палітыку, накіраваную на забеспячэнне макраэканамічнай стабільнасці, і абавязацельства рэалізоўваць глыбокія структурныя рэформы.

На думку МВФ, ключавыя структурныя рэформы павінны ўключаць: лібералізацыю коштаў, умацаванне права прыватнай уласнасці, распрацоўку стратэгіі рэструктурызацыі і прыватызацыі дзяржпрадпрыемстваў і ўвядзенне адрасных сацыяльных дапамог, а таксама дапамог па беспрацоўі для абароны найбольш уразлівых слаёў насельніцтва.

Акрамя таго, місія МВФ прыйшла да высновы, што заўчаснае змякчэнне ўладамі Беларусі грашова-крэдытнай палітыкі ў канцы першага паўгоддзя 2012 года ўзмацніла ціск на кошты і абменны курс.

На думку МВФ, для забеспячэння стабільнасці эканомікі ўладам Беларусі неабходна «праводзіць больш рашучыя меры эканамічнай палітыкі».

Дасягненне мэтавых паказчыкаў па росту ВУП пагражае макраэканамічнай стабільнасці Беларусі, лічаць у Міжнародным валютным фондзе.