Пуцін і Лукашэнка ні пра што не дамовіліся?

Беларускія эксперты пракаментавалі ўчорашнюю сустрэчу Пуціна і Лукашэнкі.

«Я не думаю, што Лукашэнка пра нешта дамовіўся з Пуціным па пастаўках нафты ў 2013 годзе на ўчорашніх перамовах у Маскве», - заявіла ў інтэрв'ю сайту charter97.org эканамічны аглядальнік Таццяна Манянок.

Па словах эксперта, у Беларусі не атрымліваецца дамовіцца па пастаўках расейскай нафты ў тым ліку і з-за «растваральнікавага» бізнесу ў гэтым годзе і з-за недапаставак бензіну на расейскі рынак:

«Беларускі бок разлічвае на 23 мільёны тон. Пакуль бакі, мабыць, працягнуць перамовы. З улікам рэканструкцыі НПЗ і таго, што бюджэтныя паказчыкі на 2013 год сфарміраваныя зыходзячы з імпарту расейскай нафты ў аб'ёме 23 мільёна тон, пастаўкі ў такім аб'ёме найбольш пажаданыя.

Аднак улічваючы некаторыя праблемы ў адносінах Беларусі і Расеі, калі Беларусь не змагла выканаць умовы балансу па пастаўках нафтапрадуктаў на расейскі рынак, а таксама датычна пытання з экспартам «растваральнікаў», пакуль не ўдаецца ўзгадніць пастаўкі расейскай нафты на будучы год».

«Я думаю, што перамовы па гэтым пытанні будуць працягвацца і нейкі кампраміс будзе дасягнуты», - падсумавала эксперт.

Нагадаем, нядаўна прэс-служба кіраўніка паведаміла, што 19 снежня ў ходзе двухбаковых перамоваў у Маскве Лукашэнка і Пуцін абмеркавалі пытанні супрацоўніцтва ў энергетычнай сферы, у тым ліку фарміраванне балансу нафты і нафтапрадуктаў у 2013 годзе.