У Беларусь паступіць чацвёртая рата крэдыту ЕўрАзЭС

(абноўлена) Рада Антыкрызіснага фонду ЕўрАзЭС прыняла пастанову аб выдачы Беларусі чацвёртай раты крэдыту ў памеры $ 440 млн.

«Гаворка ішла аб выдачы крэдыту Беларусі і забеспячэнні рэсурсамі Таджыкістана. У гэтых пытаннях прынятыя станоўчыя пастановы», - сказаў на прэс-канферэнцыі ў Менску міністр фінансаў Расіі Антон Сілуанаў.

«Грошы паступяць бліжэйшым часам», - сказаў міністр, адказваючы на пытанне аб тэрмінах паступлення сродкаў чацвёртай раты ў Беларусь.

Кіраўнік Мінфіна РФ таксама падкрэсліў, што «ніякай палітыкі ў прыняцці гэтай пастановы не было - толькі эканоміка».

Ён сказаў, што Беларусь «выканала асноўны пералік мерапрыемстваў, наконт асобных паказчыкаў дамовіліся аб карэкцыі». «Падстаў для не выдачы чарговай раты ў нас не было», - сказаў міністр.

Каментуючы адмову Беларусі ад абавязанняў аб прыватызацыі на $ 2,5 млрд у 2012 годзе, Сілуанаў канстатаваў, што «пры прыняцці пастановы аб чацвёртай раце паказчык атрымання сродкаў ад прыватызацыі не стаяў».

З ягоных слоў, гэты паказчык з'яўляецца адным з колькасных крытэраў, які будзе ўлічвацца пры прыняцці пастановы аб выдачы Беларусі наступнай, пятай раты. «Пытанне прыватызацыі - гэта пытанне чарговай праграмы, і мы будзем разглядаць яго ў наступным годзе», - сказаў міністр.

Міністр фінансаў Беларусі Андрэй Харкавец у сваю чаргу сказаў: "Я з глыбокім пачуццём падзякі стаўлюся да пастановы Рады фонду, якая пацвердзіла выніковасць прынятых у рамках стабпраграмы захадаў".

З ягоных слоў, «мы прымем абавязанні аб працягу жорсткай грашова-крэдытнай і бюджэтнай палітыкі». «Для нас праграма з фондам важная як інструмент правядзення асцярожнай эканамічнай палітыкі», - сказаў Харкавец.