У Каваленкі пагоршылася праца ўнутраных органаў

Учора яго ў віцебскім следчым ізалятары наведаў адвакат.

Вось што распавяла «Еўрарадыё» жонка Сяргея Алена Каваленка:

«Працягвае афіцыйную галадоўку пратэсту. На ўчора яна доўжылася ўжо 58 дзён. Стан ягонага здароўя ўзмацніў асцярогі за ягонае жыццё. Паколькі, па словах адваката, пагоршылася праца ўнутраных органаў».

Зварот старшыні КХП БНФ Зянона Пазняка спыніць галадоўку Сяргею Каваленку перадаць не паспелі, але адвакат распавёў пра папярэднія аналагічныя звароты. Тым не менш, Каваленка галадоўку пакуль спыняць не збіраецца.

Нагадаем, актывіста КХП БНФ Сяргея Каваленку ад 22 снежня ўтрымліваюць у віцебскім СІЗА. Яго вінавацяць у неаднаразовым парушэнні рэжыму адбывання «хатняй хіміі» (яе яму прысудзілі за вывешаны ў Віцебску бел-чырвона-белы сцяг). 21 лютага ў Першамайскім раённым судзе павінен пачацца суд. Амаль два месяцы Сяргей Каваленка трымае галадоўку, нягледзячы на ​​тое, што яго гвалтоўна кармілі.

Учора старшыня Еўрапарламента Марцін Шульц заклікаў улады Беларусі вызваліць Сяргея Каваленку. «Калі ён памрэ, рукі беларускіх уладаў будуць акрываўленыя», - гаворыцца ў заяве.