Сёння будуць судзіць Сяргея Каваленку

Напярэдадні суду над Каваленкам, яго наведаў адвакат Пётр Каваленка, каб узгадніць з падабаронным стратэгію ўдзелу ў судзе.

Па словах адваката, ягоны кліент рашуча адмаўляецца класціся ў лякарню, бо ў такім выпадку суд быў бы адкладзены на больш познюю дату, а Сяргей Каваленка хоча ў ім удзельнічаць і як мага хутчэй, перадае «Радыё Рацыя».

«21-га ў нас будзе судовае паседжанне, і таму я яго наведаю, па-першае, для таго, каб даведацца, як ён пачуваецца, таму што ён абвясціў галадоўку, і па-другое, каб падрыхтаваць яго, пагаварыць, высветліць некаторыя пытанні, якія яго цікавяць, выпрацаваць тактыку дзеянняў падчас судовага паседжання», - сказаў адвакат.

Па ягоных словах, Сяргей Каваленка схуднеў, бледны і выглядае знясіленым. Ён заўсёды раіў свайму падабароннаму адмовіцца ад такой формы пратэсту, якая знясільвае арганізм, але палітвязень у гэтым пытанні няўмольны і поўны рашучасці.

Нагадаем, Каваленку з 22 снежня ўтрымліваюць у віцебскім СІЗА. Яго вінавацяць у неаднаразовым парушэнні рэжыму адбыцця «хатняй хіміі» (яе яму прысудзілі за вывешаны ў Віцебску бел-чырвона-белы сцяг). Амаль два месяцы Сяргей Каваленка трымае галадоўку, нягледзячы на ​​тое, што яго спрабавалі сілком карміць.

21 лютага ў Першамайскім раённым судзе пачнецца суд.