Аглядная місія МВФ пачала працу ў Менску

Аглядная місія Міжнароднага валютнага фонду (МВФ), як і планавалася, у сераду пачала працу ў Менску.

Аб гэтым паведамілі агенцтву «Інтэрфакс-Захад» у беларускім прадстаўніцтве МВФ.

Місія, якую ўзначальвае Крыс Джарвіс, будзе працаваць па 6 сакавіка.

Акрамя традыцыйнага макраэканамічнага агляду і ацэнкі сітуацыі ў бягучым годзе і на сярэднетэрміновую перспектыву, дадзеная місія правядзе другі постпраграмны маніторынг.

Раней паведамлялася, што місія правядзе рэвізію макрапрагноза для Беларусі на 2012 год і на сярэднетэрміновую перспектыву, з улікам чаканага запаволення тэмпаў росту глабальнай эканомікі, у тым ліку і эканомікі Расеі, а таксама з улікам прэферэнцый, якія з 2012 года РФ дала Беларусі пры пастаўцы энерганосьбітаў .

Кіраўніцтва Нацбанка і Мінфіна Беларусі напярэдадні візіту місіі выказвалі асцярожныя надзеі на працяг дыялогу з МВФ адносна накіраванага ў маі 2011 года запыту беларускіх уладаў аб вылучэнні новага крэдыту.

Між тым, 15 лютага МВФ паведаміў, што адклікае свайго сталага прадстаўніка з Беларусі. «Фонд разгледзіць магчымасць прызначэння новага сталага прадстаўніка ў Беларусі, калі з беларускім бокам будзе планавацца новая праграма падтрымкі», - гаворыцца там.

Са студзеня 2009 года па красавік 2010 года беларускія ўлады рэалізавалі праграму МВФ stand-by, якая была падтрыманая крэдытам на $3,6 млрд. Урад і Нацбанк Беларусі 31 мая 2011 года звярнуліся ў МВФ з просьбай аб прадастаўленні новага фінансавання на суму да $ 7 млрд. Менск павінен пачаць вяртанне крэдыту МВФ у 2012 годзе, асноўная частка плацяжоў па ім прыйдзецца на 2013-2014 гады.

Раней МВФ прагназаваў запаволенне тэмпаў росту ВУП у Беларусі да 1,2% у 2012 годзе. Улады маюць намер дамагчыся росту эканомікі на 5-5,5%. МВФ ацэньваў прырост ВУП Беларусі ў 2011 годзе на ўзроўні 5%, фактычны рост эканомікі склаў 5,3%.