Амбасадары могуць не вярнуцца ў Менск пасля Вялікадня

МЗС Беларусі нават не чакае вяртання дыпламатаў ЕЗ.

Брусэльскі партал euobserver.com паведаміў пра нібыта закрытае рашэнне ЕЗ, каб амбасадары вярнуліся ў Менск пасля Вялікадня.

Дыпламаты краін Еўразвяза пакінулі беларускую сталіцу ў канцы лютага на знак салідарнасці з амбасадарам Польшчы Лешакам Шарэпкам і кіраўніком прадстаўніцтва Еўразвяза Майрай Мора, якіх МЗС Беларусі папрасіў пакінуць краіну. Афіцыйнага пацверджання інфармацыі аб чаканым вяртанні еўрапейскіх амбасадараў няма.

Мая Качыянчыч, прэс-сакратар Вярхоўнага прадстаўніка Еўразвяза па замежных справах і палітыцы бяспекі Кэтрын Эштан, не змагла пацвердзіць «Радыё Свабода» гэтую інфармацыю. Яна нагадала, што рашэнне аб выездзе еўрапейскіх амбасадараў было ўхваленае ў канцы лютага на знак адзінства і салідарнасці з амбасадарам Польшчы і кіраўніком прадстаўніцтва Еўразвяза, ад якіх улады запатрабавалі паехаць на кансультацыі:

«Гэта здарылася, яны адбылі на кансультацыі. Мы таксама пагадзіліся, што амбасадары вернуцца на аснове адзіных падыходаў і каардынацыі. Але я не магу пацвердзіць ніякі канкрэтны час іх вяртання».

Кіраўнік прэс-службы МЗС Літвы Гедрус Пажунас сказаў, што пытанне аб вяртанні ў Менск літоўскага амбасадара Эдмінаса Багдонаса «разглядаецца», але прымаць такое рашэнне Літва будзе разам з іншымі дзяржавамі ЕЗ.

У прадстаўніцтве Еўрасзвяза ў Беларусі, амбасадах шэрагу еўрапейскіх краін у Менску таксама не змаглі пацвердзіць планы вяртання амбасадараў, адкліканых на кансультацыі.

Міністэрства замежных спраў Беларусі пасля рашэння Рады Еўразвяза ад 23 сакавіка аб пашырэнні санкцый у дачыненні да беларускіх уладаў заявіла:

«У сённяшніх умовах беларускі бок не бачыць неабходнасці ў прысутнасці на тэрыторыі Беларусі адкліканых амбасадараў дзяржаў, якія прагаласавалі за гэтае рашэнне».

Прэс-сакратар МЗС Беларусі Андрэй Савіных заявіў, што гэтая пазіцыя не змянілася:

«Пазіцыі пакуль пазначаныя, нейкай новай інфармацыі па гэтым пытанні не з'явілася».

Менскі палітолаг Андрэй Фёдараў лічыць, што дыпламатычны канфлікт Беларусі і Еўразвяза можа зацягнуцца. У якасці прыкладу ён прыводзіць аналагічную сітуацыю ў адносінах Беларусі і ЗША - чацвёрты год Злучаныя Штаты прадстаўленыя ў Менску на ўзроўні часовага паверанага.

Еўрапейскія амбасадары могуць вярнуцца, калі будуць адпаведныя дзеянні і сігналы з Менска:

«Пасля таго як будуць выкананыя хоць нейкія ўмовы і хоць нейкія крокі з беларускага боку будуць зробленыя, хай невялікія, насустрач тым заклікам, якія ідуць ад аб'яднанай Еўропы. Але пакуль мы гэтага не назіраем. Наадварот, прадстаўнік МЗС сказаў, што яны не чакаюць вяртання амбасадараў».