Актывіста затрымалі за фатаграфаванне спецназа

Ва Уруччы затрымалі праціўніка будаўніцтва дамоў для спецназаўцаў.

Актывіст «Еўрапейскай перспектывы» Дзяніс Кобрусеў фатаграфаваў спецназаўцаў, якія выкарчоўвалі дрэвы на месцы будучай будаўнічай пляцоўкі. Яго затрымалі каля 9 гадзін раніцы, перадае «Еўрарадыё».

Аб здарэнні распавёў паплечнік Кобрусева Віктар Янчурэвіч.

«У скверыку выкарчоўвалі маладыя дрэвы, грузілі іх на машыны і вывозілі. Кобрусеў фатаграфаваў гэта. Да яго падышоў міліцыянт і сказаў, што супрацоўнікаў міліцыі фатаграфаваць нельга, папрасіў дакументы. Дакументаў у Дзяніса не апынулася, яго завялі ў сіні мікрааўтобус і павезлі», - сказаў Янчурэвіч.

Актывіст «Еўрапейскай перспектывы» таксама распавёў, што спецназаўцы выкарчавалі нават тыя дрэвы, якія былі пасаджаныя падчас нядаўняга суботніка. Усяго знішчана некалькі дзесяткаў саджанцаў і пяцігадовых соснаў.

Нагадаем, што канфлікт паміж жыхарамі мікрараёна ва Уруччы і будаўнікамі паўстаў некалькі месяцаў таму, калі стала вядома, што раён плануецца «ўшчыльняць». Між ўжо існуючых дамоў плануецца пабудаваць яшчэ два новых і засяліць іх супрацоўнікамі спецназа.