Еўрапарламентар падтрымала бацькоў Мікалая Дзядка

Бацькі палітвязня сустрэліся з еўрапарламентаркай і экс-кандыдаткай у прэзідэнты Фінляндыі Сары Эсаях.

Сустрэча, у якой таксама прынялі ўдзел рэктар ЕГУ Анатоль Міхайлаў і прэзідэнт моладзевай асацыяцыі StudAlliance Кірыла Атаманчык, адбылася ў Літве, недалёка ад Тракая, паведамляе studalliance.org.

Бацькі Мікалая Дзядка распавялі еўрапарламентарцы пра бягучы стан сітуацыі з ім і іншымі беларускімі палітвязнямі. Былі абмеркаваныя і ўзгодненыя пазіцыі па далейшай працы ў напрамку іх вызвалення і па інфармаванні грамадзянаў ЕЗ аб сітуацыі ў Беларусі.

Нагадаем, Сары Эсаях, сябар Еўрапарламента ад Еўрапейскай Народнай партыі, раней узяла шэфства над Мікалаем Дзядком.