Адукацыя ў Беларусі даражэе хутчэй цыгарэт

Цэны на адукацыю ў Беларусі працягваюць ставіць рэкорды.

Новыя дадзеныя Белстата яшчэ раз нагадваюць аб незайздросным становішчы студэнтаў-платнікаў: за год у сярэднім яны сталі плаціць на 90% больш. Пры гэтым Мінадукацыі не скрывае: цэны і далей будуць расці, паведамляе generation.by.

Цэны на навучанне ў беларускіх ВНУ падняліся ў параўнанні з чэрвенем 2011 года на 90.1%, а з пачатку 2012 года на 34.4%. Гэта адно з самых значных павышэнняў індэкса цэн сярод тавараў і паслуг, за якімі сочыць Белстат. Хутчэй, чым кошты на адукацыю, з пачатку года выраслі толькі тарыфы на водазабеспячэнне і абслугоўванне ў санаторыях.

Напрыклад, калі з чэрвеня 2011 г студэнты сталі плаціць на 90.1% больш, то за той жа час цыгарэты ў Беларусі падаражэлі на 55.8%, адзенне - на 67.3%, а тарыфы ў сярэднім - на 56%.

Апошні раз цэны на адукацыю ў беларускіх ВНУ раслі ў чэрвені - тады іх паднялі на 5%. Да гэтага тарыфы выраслі ў лютым (на 29%), у лістападзе 2011 года (у сярэднім на 20-25%). Да гэтага іх падымалі ў жніўні і вясной мінулага года, а таксама ў студзені 2011 года.

Рост адукацыйных тарыфаў у тры разы абганяе інфляцыю

Звычайна рост коштаў на адукацыю тлумачаць падвышэннем тарыфнай стаўкі першага разраду. Вядома, што гэтую велічыню, ад якой часткова залежаць зарплаты выкладчыкаў, зменяць ў гэтым годзе яшчэ мінімум двойчы і першы раз ужо ў жніўні. Гэта значыць, што павышэння коштаў варта чакаць ужо да верасня.

Характэрна тое, што ўступная кампанія фактычна падыходзіць да завяршэння: усе іспыты ЦТ здадзены. А кошты навучання на наступны год да гэтага часу універсітэтамі не абвешчаны. Студэнты вымушаныя выбіраць ВНУ ў надзеі, што плата будзе паднята нязначна. Хаця для кагосьці, мабыць, вераснёўскае павышэнне коштаў стане поўным сюрпрызам.

Аб яго маштабах можна меркаваць па звестках аб новых цэнах у Брэсцкім універсітэце. Верагодна, студэнты новага набору будуць плаціць за адукацыю ў Брэсце столькі ж, колькі цяпер плацяць першакурснікі юрфака БДУ.

Тэндэнцыя першай паловы года кажа аб сумных перспектывах для кашалька студэнтаў і іх бацькоў: адукацыйныя тарыфы абагналі інфляцыю за гэты перыяд у тры разы (10/5%). Урад разлічвае ўтрымаць гадавую інфляцыю на ўзроўні 19-22%. Ці варта чакаць пры такіх планах павышэння адукацыйных тарыфаў яшчэ на 30% у параўнанні з пачаткам года?