Сацыяльнае малако знікла і ў Гародні

Жыхары абураны: трэба паўгорада аб'ехаць, каб купіць таннае малако.

Малако па нізкіх цэнах усё радзей стала сустракацца на прылаўках беларускіх крам. Газета «Гарадзенская праўда» піша, што тэма «сацыяльнай» прадукцыі — самая папулярная ў зваротах чытачоў.

«Паўгорада аб'ехала, каб купіць таннае малако», - кажа раззлаваны чытач газеты.

У малочным аддзеле на Скідальскім рынку ў Гародню зранку выбар прадукцыі даволі вялікі. Самае таннае малако — 2,4-адсоткавае з кальцыем «Малочнага Свету» — па цане 4900 рублёў, кефір — 4950 рублёў.

«Навошта нам малако з кальцыем, дайце мне без дадаткаў і танней», — абураюцца пакупнікі.

Прадавец прапануе «чыстае» малако ад «Малочнага Свету» ў палімернай бутэльцы, 2-адсоткавае. Але па цане 6400 рублёў. Даражэй стала і малако СПК «Прагрэс-Верцелішкі» Гарадзенскага раёна. Накінуўшы дзясятыя дзелі тлустасці, прадпрыемства падняло цану да 5700 рублёў за літр.

Як купіць таннае малако нізкай тлустасці — самае частае пытанне ў рубрыцы «Голас народа». Таму ў чарговы раз адрасуем яго адказным ведамствам.

Як вядома, малако тлустасцю больш 3,2% і з рознымі дадаткамі ўжо не ставіцца да сацыяльна значных тавараў. Такім чынам, цэны на такі прадукт не рэгулююцца. І вытворца мае права іх падняць, нават калі тлустасць «падрасла» ўсяго на дзясятую долю адсотка.

Такі ход для прадпрыемстваў — мера вымушаная. Як расказваюць у ГО «Гроднамясамалпрам», вытворчасць «сацыяльнага» малака і рэалізацыя яго па нізкіх цэнах у цяперашнім годзе прывялі да таго, што перапрацоўнікі атрымалі значныя страты. Вытворцы спрабуюць перакрыць страту ад паставак на беларускі рынак прыбыткамі ад экспартнай прадукцыі, але не заўсёды гэта атрымоўваецца. Таму малаказаводы нерэнтабельную прадукцыю проста не хочуць выпускаць.

Як паведамілі ў камітэце па сельскай гаспадарцы і харчу аблвыканкама, у цяперашнім годзе склалася сітуацыя, калі цана за літр «сацыяльна значнага» малака менш, чым кошт сыравіны, з якога яго вырабілі. Хоць, апроч сыравіны, трэба траціцца на тару, зарплату, электраэнергію, падаткі, амартызацыю, рэкламу. Ніякіх датацый пры гэтым перапрацоўнікі не атрымліваюць. Рэальная цана малака павінна быць не менш 5000 рублёў за літр, каб завод хоць бы пакрываў страты ад рэалізацыі на ўнутраны рынак.