Збіты міліцыяй Молчан аштрафаваны на 800 тысяч рублёў

Суд Першамайскага раёна аштрафаваў актывіста «Еўрапейскай Беларусі» на 8 базавых велічынь.

19 траўня Андрэй Молчан разгарнуў нацыянальны сцяг у ажыўленым месцы Менска, побач з універсамам «Першамайскі» ў знак салідарнасці з палітвязнем Сяргеем Каваленкам. Праз некаторы час да яго падбеглі супрацоўнікі міліцыі, выдралі сцяг, павалілі на зямлю і сталі збіваць. Потым яго кінулі ў машыну, дзе працягнулі біць да страты прытомнасці. Ачнуўся Молчан толькі ў аддзяленні міліцыі Першамайскага раёна. Міліцыянеры былі вымушаны выклікаць да яго «хуткую» і адвезці ў лякарню.

Суд над актывістам прайшоў сёння.

Сведкамі, якія далі хлуслівыя сведчанні пра тое, што актывіст нецэнзурна лаяўся, выступілі Аляксандр Куцко і Аляксандр Ігнатовіч. Як расказаў сайту charter97.org Андрэй Молчан, менавіта яны першымі ўбачылі яго са сцягам і выклікалі міліцыю. Абодва сведкі блыталіся ў сведчаннях, адмаўлялі тое, што актывіст быў збіты, і казалі, што ён сам нападаў на іх. Аднак яны, паводле словаў Молчана, не ўжывалі сілу ў адносінах да яго. Тых супрацоўнікаў міліцыі, якія збівалі актывіста, у судзе не было. На яго думку, кіраўніцтва Першамайскага РУУС не захацела «свяціць» дадзеныя міліцыянераў-садыстаў.

На падставе хлуслівых сведчанняў Куцко і Ігнатовіча суддзя Сяргей Люсцік прызнаў Молчана вінаватым у парушэнні артыкула 23.34 і вынес рашэнне аб штрафе ў 800 тысяч беларускіх рублёў.