Па допінгавай справе Астапчук правядуць расследаванне

Нацыянальнае антыдопінгавае агенцтва Беларусі пачало расследаванне ў сувязі з дыскваліфікацыяй за допінг на Алімпіядзе беларускай штурхальніцы ядра Надзеі Астапчук.

«Сёння намі (НАДА - ІФ) пачата расследаванне па факце парушэння Надзеяй Астапчук антыдопінгавых правілаў», - паведаміў агенцтву «Інтэрфакс-Захад» у аўторак дырэктар НАДА Аляксандр Ванхадла.

«У ходзе расследавання мы павінны ўстанавіць, ці меў месца прыём гэтага прэпарата. Такое ж расследаванне пачата паралельна і Міжнароднай федэрацыяй лёгкай атлетыкі», - паведаміў А.Ванхадла.

«Дысцыплінарная камісія Міжнароднага Алімпійскага камітэта не займаецца расследаваннем. Яна ствараецца толькі на час Алімпійскіх гульняў», - растлумачыў дырэктар НАДА.

«Калі мы правядзем расследаванне, атрымаем дадзеныя, калі стане ясная карціна, тады будзем прымаць рашэнне, якія крокі рабіць далей. У нас ёсць 21 дзень, каб падаць апеляцыю, з моманту паведамлення нас аб станоўчай допінг-спробе спартсменкі», - сказаў А. Ванхадла.

Ён растлумачыў, што ў ходзе расследавання медыцынскіх даследаванняў рабіцца не будзе. «НАДА будзе расследаваць, быў аднакратны або шматразовы прыём прэпарата, альбо яго наогул не было. Будзем супастаўляць адказы спартсменкі і трэнера з той інфармацыяй, якую атрымалі ад дысцыплінарнай камісіі МАК», - сказаў А.Ванхадла.

Як паведамляла агенцтва, у мінулы панядзелак МАК на сваім сайце размясціў інфармацыю аб тым, што Н.Астапчук, якая выйграла «золата» у Лондане, дыскваліфікавалі за ўжыванне допінгу.

МАК паведаміў, што ў допінг-спробе беларускай спартсменкі выяўлены прэпарат меценалон, які ўваходзіць у лік забароненых для ўжывання спартсменамі лекаў.

Чэмпіёнкай Алімпійскіх гульняў аб'яўлена Валеры Адамс (Новая Зеландыя), якая заняла ў спаборніцтвах другое месца. Сярэбраным прызёрам стала расеянка Яўгенія Калодка, у якой быў трэці вынік і якой раней быў уручаны бронзавы медаль.

Бронзавая ўзнагарода перайшла да кітаянкі Гун Ліцзяо (Кітай), якая заняла чацвёртае месца.