АКФ ЕўрАзЭС папярэджвае аб новым крызісе ў Беларусі

Антыкрызісны фонд папярэджвае беларускія ўлады аб недапушчальнасці штучнага стымулявання росту эканомікі.

«Кіраўнік прапануе абмежаваць стымуляванне росту ВУП у 2012 годзе максімальным аб'ёмам чыстага крэдытавання ў рамках дзяржпраграм у памеры 7 трлн беларускіх рублёў і устанаўленнем максімальнага агульнага росту крэдытаў эканомікі ў памеры 15%. Гэтыя меры дазволяць знізіць інфляцыю да 20% да канца 2012 года і забяспечаць эканамічны рост на ўзроўні 2-3%», - сказана ў апублікаванай на сайце АКФ ацэнцы справаздачы беларускіх улад аб выкананні умоў трэцяга траншу стабкрэдыту, які паступіў у Менск у чэрвені гэтага года, перадае «Інтэрфакс».

Каментуючы намеры ўлад дасягнуць 5%-га росту ў 2012 годзе, аўтары ацэнкі падкрэсліваюць, што «любыя спробы штучна стымуляваць эканоміку для дасягнення запланаванага ўладамі росту ВУП на ўзроўні 5% будуць аказваць моцны ціск на ўзровень міжнародных рэзерваў, валютны курс і інфляцыю, і праз назапашванне структурных дыспрапорцый знізяць канкурэнтаздольнасць эканомікі. Да тых жа вынікаў можа прывесці імкненне ўлад значна павысіць заработную плату».

Эксперты АКФ падкрэсліваюць узмацненне значнасці мер жорсткай грашова-крэдытнай палітыкі з улікам верагоднага пагаршэння знешняй кан'юнктуры. «З-за існавання магчымасці негатыўнага развіцця падзей, у рамках якога на працягу застаўшайся часткі 2012 года сусветныя цэны на нафту застануцца ў раёне 80 даляраў за барэль і тэмпы росту ВУП Расеі знізяцца да 2%, асабліва важна прытрымлівацца стрымліваючай манетарнай палітыкі і працягваць папаўняць міжнародныя рэзервы з непазыковых крыніц, так як магчымасць прыцягнення знешняга фінансавання значна скароціцца. Інакш інфляцыя можа дасягнуць 50%, а міжнародныя рэзервы знізяцца да 1 месяца імпарту пры мінімальным росце ВУП», - мяркуюць эксперты.

У іх справаздачы сказана, што «нягледзячы на значнае паляпшэнне знешнегандлёвых дысбалансаў, асабліва з пачатку 2012 года, гэтыя станоўчыя змены шмат у чым вызначаюцца знешнімі фактарамі, і галоўным чынам - новымі энергетычнымі субсідыямі ад Расеі. Вопыт эканамічнага развіцця Беларусі сведчыць аб значнай залежнасці краіны ад міжнароднай кан'юнктуры - ва ўмовах яе пагаршэння, падзенне попыту на асноўныя тавары беларускага экспарту прывядзе да паслаблення вонкавага балансу краіны, нягледзячы на выйгрыш, звязаны са зніжэннем кошту імпарту».

Эксперты фонду адзначаюць, што жорсткая грашова-крэдытная палітыка неабходна і для мінімізацыі ў сярэднетэрміновай перспектыве адміністрацыйнага кантролю над коштамі, які скажае коштавыя сігналы. «Адміністрацыйны кантроль над коштамі, які ўжываецца ў цяперашні час, стрымлівае карэкціроўку адносных цэн і абцяжарвае прыняцце аптымальных рашэнняў па эфектыўным размеркаванні рэсурсаў і рэструктурызацыі эканомікі. У прыватнасці, гэта ўплывае на правільнасць ацэнкі прагнозу па інфляцыі і ступені станоўчасці рэальных працэнтных ставак як базы для прыняцця рашэнняў па змене стаўкі рэфінансавання НБ РБ з мэтай выхаду на прымальныя і жаданыя ўзроўні інфляцыі», - сказана ў дакуменце.

У цэлым эксперты лічаць, што «дасягнутая раўнавага з'яўляецца дастаткова далікатнай, і паспяховае завяршэнне стабілізацыі цалкам залежыць ад падтрымання ўладамі РБ жорсткай грашова-крэдытнай і бюджэтна-падатковай палітыкі», нягледзячы на тое, што вынікі стабілізацыі ў беларускай эканоміке названы «уражлівымі".

«Кіраўнік заклікае ўлады РБ улічыць вышэйпрыведзеныя рызыкі і прыняць меры для мінімізацыі негатыўных наступстваў у выпадку наступлення другой хвалі крызісу", - сказана ў дакуменце АКФ.