Лявон Вольскі: Будзем працягваць змагацца за палітвязняў

У трэці дзень марафона салідарнасці на офісе Партыі БНФ выступіў Лявон Вольскі.

На мерапрыемстве быў аншлаг. Месцаў не хапала, таму частка прысутных сядзела на падлозе і стаяла на калідоры.

«Мы можам змагацца вось так - канцэртамі прыцягнуць увагу да праблемы нашых палітвязняў. Мы будзем працягваць гэта рабіць. Калі нам прапанавалі выступіць, мы з радасцю пагадзіліся», - сказаў Лявон Вольскі перад пачаткам выступлення.

Такія песні, як «Тры чарапахi», «Госцi», «Менск і Мінск» зала спявала разам з музыкам. У канцы мерапрыемства Лявон Вольскі ахвотна раздаваў аўтографы і фатаграфаваўся, а музыка Павел Аракелян падпісваў дыскі і дарыў ўсім жадаючым.

Нагадаем «Музычны марафон салідарнасці» стартаваў 10 верасня ў Менску.

Як паведамілі charter97.org яго арганізатары, выступленні працягнуцца сёння і заўтра ў 18 гадзін на офісе Партыі БНФ (Менск, Чарнышэўскага, 3). У марафоне салідарнасці ўжо прынялі ўдзел Зміцер Бартосік, Славамір Адамовіч, Зміцер Вайцюшкевіч, Лявон Вольскі, Павел Аракелян, Алесь Пушкін.

Уваход на мерапрыемства вольны, але на іх праводзіцца збор ахвяраванняў сем'ям палітвязняў.