Старшыні Ельскага райвыканкама больш не свеціць Touareg

Пасля публікацыі аб кошце службовых аўто для чыноўнікаў Ельскі райвыканкам адмовіўся купляць машыну для старшыні за 600 мільёнаў рублёў.

Цяпер старшыня Ельскага райвыканкама Леанід Пісанік ездзіць на Nissan. У райвыканкаме за свайго кіраўніка хвалююцца, кажуць, што машына чыноўніка ўжо старая.

«У старшыні Nissan. Яна старая вельмі. Развальваецца», - кажуць у выканкаме.

У канцы жніўня Ельскі райвыканкам абвясціў аўкцыён на куплю новага аўтамабіля. Чыноўніку быў патрэбны менавіта Touareg V6 TDI Tiptronic. Кошт 600 мільёнаў рублёў, аплата з мясцовага бюджэту.

Карэспандэнты «Еўрарадыё» пацікавіліся, ці купілі ў выканкаме аўто. Там кажуць, што машыну не набылі і адмаўляюцца ад далейшых каментароў, адсылаючы на сайт дзяржзакупак.

А вось на сайце паказана, што аўкцыён адменены і абвешчаны... памылковым.