Плаціць па пазыках няма чым: дыктатар бярэ новыя крэдыты

У 2013 годзе Беларусь плануе напалову рэфінансаваць знешнюю пазыку.

Пра гэта паведаміў міністр фінансаў Андрэй Харкавец, выступаючы 26 верасня на пашыраным пасяджэнні камісіі па бюджэце, фінансах і падатковай палітыцы «палаты прадстаўнікоў», піша БелаПАН.

Ён адзначыў, што ў 2013 годзе Беларусь «уваходзіць у паласу пікавых выплат па знешняй дзяржаўнай пазыке». «Чакаецца двухразовы прырост плацяжоў у параўнанні з бягучым годам да 3,1 млрд. даляраў ЗША», - падкрэсліў міністр.

У сувязі з гэтым, адзначыў Харкавец, урад ставіць перад сабой задачу рэфінансаваць частку пазыковага пакета. «Будзем працаваць па наступных напрамках: па-першае, над атрыманнем двух траншаў крэдыту з Антыкрызіснага фонду ЕўрАзЭС у аб'ёме 0,9 млрд. даляраў. Па-другое, мы ўжо ў гэтым годзе пачалі працу па выхаду на міжнародныя рынкі капіталу з мэтай магчымага размяшчэння дзяржаўных аблігацый ў 2013 годзе», - паведаміў кіраўнік Мінфіна.

Ён запэўніў, што ў 2013 годзе па паказчыках эканамічнай бяспекі Беларусь будзе знаходзіцца «у стабільным становішчы». «Знешняя дзяржаўная пазыка складзе 21,1% ВУП (мы маем парог не больш за 25%). Унутраная дзяржаўная пазыка складзе 3% пры парозе не больш за 20%. Плацяжы па абслугоўванні дзяржаўнай пазыкі - 7,8% адсотка да даходаў рэспубліканскага бюджэту (парогавае значэнне - не больш за 10%)», - заявіў Андрэй Харкавец.