Ярашук: МАП можа ўжыць свае інструменты для ціску на ўлады Беларусі

Міжнародная арганізацыя працы можа ўжыць свае інструменты для ціску на ўлады Беларусі, каб забарона на звальненне работнікаў дрэваапрацоўчых прадпрыемстваў не пачала дзейнічаць.

Аб гэтым заявіў БелаПАН старшыня Беларускага кангрэсу дэмакратычных прафзвязаў (БКДП) Аляксандр Ярашук.

Прафзвязавы лідар пагадзіўся са спецыяльным дарадцам генеральнага дырэктара МАП Кары Тапіёлам, які напярэдадні заявіў у інтэрв'ю Deutsche Welle (Нямеччына), што арганізацыя гатовая разгледзець скаргі на забарону звальненняў на дрэваапрацоўчых прадпрыемствах Беларусі, але пакуль такіх на адрас МАП не паступала.

«Кары Тапіёла абсалютна мае рацыю ў тым, што МАП будзе разглядаць выключна прэцэдэнты, бо арганізацыя дзейнічае толькі ў прававым полі, - сказаў Ярашук, - але гэта зусім не азначае, што МАП не будзе выкарыстоўваць свае палітычныя інструменты для ціску на беларускія ўлады, каб такіх прэцэдэнтаў і не ўзнікла».

«Калі прэцэдэнтаў не будзе, то мы будзем меркаваць, што дасягнулі пэўнай мэты разам з міжнароднай супольнасцю, беларускімі і міжнароднымі прафзвязавымі арганізацыямі», - адзначыў ён.

Лідар БКДП таксама паведаміў, што прафзвязавы цэнтр сочыць за сітуацыяй на дрэваапрацоўчых прадпрыемствах. Пакуль няма інфармацыі пра тое, што дэкрэт выкарыстоўваецца ў якасці інструмента прымусовай працы. «Напраўду пакуль нічога надзвычайнага не адбылося, у нас няма ніякай інфармацыі з гэтай нагоды. Трэба мець на ўвазе, што яшчэ ёсць пэўны момант інэрцыі паміж тым, калі дэкрэт прымаецца і калі ён пачынае дзейнічаць», - растлумачыў Ярашук.

«Рэакцыя з боку міжнароднай супольнасці і, што вельмі важна, расейскіх прафзвязаў з'явілася вельмі непрыемным сюрпрызам для беларускай улады», - мяркуе Ярашук.