Адвакатам ды ІП скарацілі дапамогу на дзяцей у 2 разы

Чыноўнікі мяркуюць, што гэтыя мамы могуць працаваць і ў дэкрэтным адпачынку.

Нагадаем, днямі ў Беларусі пачаў дзейнічаць новы закон аб дапамогах на дзяцей. Адной з галоўных яго навацый, пра якую радасна распавядалі і распрацоўнікі дакумента, і «дэпутаты», якія за яго галасавалі, гэта дапасаванне дапамогі на дзяцей да 3-х гадоў да даходаў усіх беларусаў. Так, напрыклад, маці з адным дзіцем абяцаюць плаціць 35% ад сярэдняга заробку ў краіне, на другога і наступных дзяцей - 40%, піша «Комсомольская правда в Беларуси».

Але высветлілася, што не ўсе бацькі могуць парадавацца падвышэнню дапамогі. Ужо вядома, што самотныя маці больш не будуць атрымліваць набаўку да дапамогі, якую ім плацілі. А вось мамы, якія працуюць адвакатамі, прыватнымі натарыусамі або індывідуальнымі прадпрымальнікамі, наогул будуць атрымліваць толькі 50% ад тых дапамог, якія атрымаюць звычайныя мамы. Закране новы закон і тых, хто займаецца рамеснай дзейнасцю: гэта значыць шые, вяжа, малюе дома. Маўляў, усе яны могуць працаваць і ў дэкрэце. Праўда, як адной рукой калыхаць калыску, а другой, напрыклад, прадаваць боты на базары, наверсе не тлумачаць.

- У законе нас усіх ураўнавалі: і тых, хто працуе ў дэкрэтным адпачынку, і тых, хто сядзіць дома з дзіцем. Я цяпер не працую, сяджу дома з дзіцем, дык чаму я павінна атрымліваць 50% дапамогі? - Распавядае адвакатка Алена. - Плюс тыя, хто пісаў закон, не ўлічылі ўсіх драбніц адвакацкай дзейнасці: у нас усё празрыста, і неўпрыкмет весці сваю дзейнасць, каб атрымліваць дапамогу ў поўнай суме, немагчыма. У адвакатаў усё дакументальна зафіксавана: усе ганарары ўносяцца ў касу, выдаецца ордэр з подпісам загадчыка. Гэта значыць, вельмі шмат момантаў, якія дазваляюць адсачыць, ці адвакат працуе. А калі закон пачне дзейнічаць, то мая дапамога не тое што не вырасце, а наадварот, яшчэ і зменшыцца. Цяпер я атрымліваю 880 тысяч рублёў на дзіця, а буду атрымліваць 800 тысяч, бо будуць лічыць ад сярэдняга заробку ў краіне.

Цяпер Мінпрацы рыхтуе афіцыйны каментар да закона, які змесціць на сваім сайце днямі. А пакуль навацыя тлумачыцца так: у адвакатаў ёсць ліцэнзія на вядзенне адвакацкай дзейнасці, і каб атрымліваць дапамогу ў поўнай суме, яны могуць выйсці з калегіі адвакатаў на перыяд выхавання дзіцяці да трох гадоў, а потым зноў у яе ўступіць. Тое ж самае з ІПэшнікамі: на час выхавання дзіцяці можна спыніць сваю дзейнасць і атрымліваць дапамогу цалкам. Зноўку зарэгістравацца нескладана: рэгістрацыя ІП займае два дні.