ЗША пагражаюць санкцыямі ўкраінскім алігархам

Сталі вядомыя падрабязнасці сустрэчы намесніка дзяржсакратара ЗША Вікторыі Нуланд з украінскім алігархам Рынатам Ахметавым.

Крыніца Цензор.Нет, блізкая да дыпламатычных колаў, паведаміла дэталі перамоваў намесніка дзяржсакратара ЗША Вікторыі Нуланд з алігархам Рынатам Ахметавым, якія адбыліся ў Кіеве.

Нуланд паведаміла, што ў выпадку зачысткі Еўрамайдана, ЗША і лідары ЕЗ узгаднілі адзіную пазіцыю - неадкладнае ўвядзенне санкцый супраць вядучых палітыкаў і алігархаў з атачэння прэзідэнта Януковіча. Прычым спіс будзе пастаянна дапаўняцца такім чынам, каб перакрыць усе кантакты з ЕЗ і ЗША не толькі для тых дзеячаў улады, хто браў удзел у сілавым разгоне, але і для тых, хто не ўзяў удзел у абароне мірнага сцэнара. Гэта вельмі важны дадатак, які не дазволіць ухіліцца ад адказнасці нікому ў кіраўніцтве Партыі рэгіёнаў і сярод яе спонсараў. Ахметаў на сустрэчы казаў, што ў мінулы панядзелак ён спрабаваў утрымаць прэзідэнта Януковіча ад прымянення сілы супраць Еўрамайдана, але Януковіч адмовіўся яго прыняць. Нуланд запатрабавала арганізаваць круглы стол з апазіцыяй і грамадзянскай супольнасцю ад кіраўніцтва ПР наўпрост - нават насуперак пазіцыі Януковіча. Сілавога варыянту быць не павінна. Нуланд не толькі заявіла пра санкцыі - яна канкрэтызавала гэтую пагрозу, назваўшы спіс асобаў, якія разам з сем'ямі патрапяць пад санкцыі ў першую чаргу.

Гэта Рынат Ахметаў, Вадзім Навінскі, Андрэй і Сяргей Клюевы.

Чаму менавіта яны? Таму што Ахметаў кантралюе 55 дэпутатаў фракцыі Партыі рэгіёнаў, а Клюеў мае мандат ад «маладой каманды» на кіраванне астатняй часткай фракцыі. ЗША чакаюць, што фракцыя Партыі рэгіёнаў падтрымае ўсе чатыры патрабавання апазіцыі, пасля якіх можа быць пачаты мірны перамоўны працэс:

1. Абвяшчэнне датэрміновых прэзідэнцкіх выбараў.

2. Абвяшчэнне датэрміновых парламенцкіх выбараў.

3. Вызваленне Цімашэнка і поўнае аднаўленне яе грамадзянскіх правоў.

4. Узбуджэнне крымінальных спраў супраць усіх супрацоўнікаў МУС і «Беркута», якія бралі ўдзел у разгоне мірных дэманстрацый.

Нуланд катэгарычна заявіла, што невыкананне гэтых умоў паставіць пад вялікае пытанне ўсякую аперацыйную дзейнасць кампаній ДТЭК і «Метінвест» Ахметава за мяжой. Нуланд выразна акрэсліла: гэтыя кампаніі размясцілі актывы ў Еўропе, у Еўропе і ЗША ў іх асноўныя рынкі збыту, усе кіраўнікі гэтых кампаній маюць нерухомасць за мяжой, а сям'я Ахметава - падатковыя рэзідэнты Велікабрытаніі. ДТЭК і Метінвест маюць буйныя абавязацельствы перад міжнароднымі інвестарамі ў выглядзе валютных аблігацый.

Такім чынам, ЗША упершыню не проста абвясцілі ўльтыматум алігархам ў атачэнні Януковіча, але і дэталёва канкрэтызавалі у якой форме і на якім узроўні гэтыя санкцыі будуць ужытыя.

Сустрэча Нуланд менавіта з Ахметавым паказала важны прынцыповы момант: ЗША не лічаць больш Віктара Януковіча надзейным партнёрам у мірным урэгуляванні. Пасля таго, як Януковіч падмануў віцэ-прэзідэнта ЗША Джо Байдэна, паабяцаўшы апошняму не праводзіць разгон Еўрамайдана, і тым не менш, усё роўна ужыў сілу, прэзідэнт Украіны ўжо не лічыцца ў Вашынгтоне фігурай, на словы якой можа абапірацца перамоўны працэс. ЗША дэманстратыўна не лічаць удзельнікамі перамоваў прадстаўнікоў «маладой каманды». Нуланд разумее, што непасрэдна загады на разгон дэманстрацый даваў міністр МУС Віталь Захарчанка, якога «маладая каманда» «здаваць» не мае намеру.

Нуланд, не называючы імёнаў, дала зразумець Ахметаву, што працэдуры праверкі стану рахункаў вядучых алігархаў і афіліяваных з імі структур могуць падвергнуцца неадкладным праверкам фінансавых амбудсменаў. Такім чынам, усе рахункі Сям'і, якія так беражліва раскасавалі па замежных банках структуры Сяргея Курченкі, таксама патрапяць пад першы ўдар.

Вычарпаўшы ўсе магчымасці зносінаў з Януковічам, ЗША і Еўразвяз вырашылі распачаць апошнія намаганні перад увядзеннем санкцый супраць украінскіх алігархаў - яны звярнуліся з патрабаваннем да лідараў Партыі рэгіёнаў пайсці супраць волі Януковіча і арганізаваць па сутнасці партыйны бунт.