«Хваля Салідарнасці» пачалася з Бабруйска

Бабруйскія актывісты Беларускай Хрысціянскай Дэмакратыі 12 лютага пачалі ўсебеларускую кампанію «Хваля Салідарнасці», мэтай якой з'яўляецца падтрымка беларускіх палітвязняў.

У акцыях узялі ўдзел таксама актывісты Маладых Хрысціянскіх Дэмакратаў, Аб'яднанай грамадзянскай партыі і Прафсаюза РЭП, паведамляе прэс-служба БХД.

Як распавяла каардынатар аргкамітэта БХД па Магілёўскай вобласці Таісія Кабанчук, актывісты распаўсюдзілі сотні ўлётак і плакатаў з інфармацыяй пра палітвязняў па паштовых скрынях бабруйчан і сценах дамоў.

Таксама яны вывесілі дзве расцяжкі з заклікам да вызвалення палітвязняў: адну - на прыпынку грамадскага транспарту «Ялавікі», другую - на ўездзе ў горад. Акрамя таго, яны на працягу некалькіх дзён на вуліцах горада раздавалі гараджанам паштоўкі з заклікам падпісаць іх і даслаць палітвязням - бабруйчаніну, актывісту БХД Яўгену Васьковічу і заключанаму ў Бабруйску праваабаронцу Алесю Бяляцкаму. Гараджане па-рознаму рэагавалі на просьбу, многія не хацелі мець зносіны, казалі, што нічога не ведаюць пра палітвязняў, і толькі некаторыя знайшлі ў сабе мужнасць выказаць некалькі слоў у падтрымку. Сёння ўсе гэтыя паштоўкі былі дасланыя палітвязням.

Адначасова з гэтым дэмакратычныя актывісты на галоўнай плошчы Бабруйска насупраць гарвыканкама паставілі два снегавіка, якіх часткова пафарбавалі ў чырвоны колер і ўпрыгожылі нацыянальнымі сцягамі. «Такім чынам, сваю салідарнасць нават выказалі бел-чырвона-белыя снегавікі», - адзначыла Таісія Кабанчук.

Нагадаем, што марафон «Хваля Салідарнасці» пройдзе па 37 гарадах Беларусі і скончыцца акцыяй у Дзень Волі ў Менску.