Справу па факце смерці Магніцкага ў СІЗА зачынілі

Следчы камітэт Расеі спыніў крымінальную справу па факце смерці супрацоўніка фонду Hermitage Сяргея Магніцкага ў сувязі з адсутнасцю падзеі злачынства.

«У ходзе расследавання крымінальнай справы аб'ектыўных дадзеных аб здзяйсненні ў дачыненні да Сяргея Магніцкага злачынстваў не ўстаноўлена», - гаворыцца ў паведамленні СКР.

У ведамстве адзначылі, што мера стрымання ў выглядзе заключэння пад варту ў дачыненні да Магніцкага абіралася ў адпаведнасці з нормамі закона і пры наяўнасці дастатковых падстаў, перадае ВВС.

«Пры знаходжанні Магніцкага у следчых ізалятарах у дачыненні да яго не ствараліся спецыяльныя ўмовы ўтрымання пад вартай, адрозныя ад умоваў утрымання іншых следча-зняволеных, не было якога-небудзь ціску, не ужываўся фізічны гвалт альбо катаванні», - адзначаецца ў паведамленні.

Сваякі Сяргея Магніцкага ўжо заявілі, што абскардзяць рашэнне аб спыненні крымінальнай справы па факце яго смерці.

«Магчымасць абскардзіць такія рашэнні прадугледжаная. Зразумела, мы будзем гэта рабіць», - сказаў «Інтэрфаксу» адвакат маці Магніцкага Мікалай Гарохаў, дадаўшы, што даведаўся аб спыненні справы ад журналістаў.

Аўдытар інвестыцыйнага фонду Hermitage Capital Сяргей Магніцкі быў арыштаваны ў лістападзе 2008 года па абвінавачванні ў тым, што дапамагаў кіраўніку кампаніі Уільяму Браўдэру ўхіляцца ад выплаты падаткаў.

Незадоўга да гэтага Магніцкі абвінаваціў групу міліцэйскіх чыноў і падатковых інспектараў у тым, што яны з дапамогай выкрадзеных дакументаў некалькіх фірмаў Браўдэра скралі з дзяржбюджэту 5,4 млрд рублёў (230 млн даляраў ЗША). Арыштавалі Магніцкага тыя самыя людзі, якіх ён абвінаваціў.

На працягу 11 месяцаў Магніцкі знаходзіўся ў «Бутырцы», а затым быў пераведзены ў «Матроскую цішыню», дзе і звярнуўся за медыцынскай дапамогай.

Смерць юрыста ў лістападзе 2009 года выклікала шырокі грамадскі рэзананс і абурэнне шэрагу міжнародных праваабарончых арганізацый.

Следства па справе аб гібелі Магніцкага працягвалася больш за два гады.

У снежні 2012 года адзіны абвінавачаны па справе аб смерці юрыста, былы намеснік начальніка СІЗА «Бутырка» Дзмітрый Кратаў быў апраўданы Цвярскім судом Масквы ў сувязі з адсутнасцю ў яго дзеяннях складу злачынства.

Маці і ўдава Сяргея Магніцкага і іх адвакаты лічаць, што Дзмітрый Кратаў быў прызначаны «стрэлачнікам», а следства, абвінавачванне і суд пастараліся зрабіць так, каб рэальныя вінаватыя пераследу і смерці юрыста сышлі ад адказнасці.

Акрамя Дзмітрыя Кратава, у якасці падазраванай фігуравала яго падпарадкаваная Ларыса Літвінава, аднак у красавіку 2012 года Следчы камітэт спыніў крымінальны пераслед Літвінавай ў сувязі са зменамі ў Крымінальным кодэксе.