Піліпца абвінавацілі ў злоўжыванні ўладай

Гомельскім чыноўнікам, замяшаным у кватэрным скандале, прад'яўленыя канчатковыя абвінавачванні.

Следчым камітэтам завершанае папярэдняе следства па крымінальнай справе, узбуджанай у дачыненні да службовых асоб Гомельскага гарвыканкама, справа перададзеная пракурору для прыняцця рашэння аб накіраванні ў суд, паведамілі агенцтву «Інтэрфакс» у аддзеле інфармацыі і сувязі з грамадскасцю СК (АІСА СК).

Канчатковыя абвінавачванні ў здзяйсненні злачынстваў прад'яўленыя былому старшыні Гомельскага гарвыканкама Віктару Піліпцу, арыштаванаму ў верасні мінулага года, а таксама шэрагу службовых асоб УКБ Гомельскага гарвыканкама: дырэктару прадпрыемства, яго намесніку па эканоміцы і фінансах, начальніку жыллёва-інвестыцыйнага аддзела, былому начальніку планава-дамоўнага аддзела , праінфармавалі ў камітэце.

«Дзеянні абвінавачаных кваліфікаваныя па ч. 2 і ч.3 арт.424 (злоўжыванне ўладай і службовымі паўнамоцтвамі, здзейсненыя службовымі асобамі, у тым ліку тымі, якія займаюць адказнае становішча, з карыслівай і іншай асабістай зацікаўленасці, што пацягнула прычыненне істотнай шкоды правам і законным інтарэсам грамадзян, дзяржаўным і грамадскім інтарэсам) Крымінальнага кодэкса», - адзначылі ў АІСА.

Паводле інфармацыі Следчага камітэта, у ходзе следства ўстаноўлена, што абвінавачаныя, знаходзячыся ў вышэйзгаданых пасадах, у верасні-кастрычніку 2011 года незаконна размеркавалі паміж сабой, сваімі сваякамі, блізкімі і знаёмымі кватэры ў шматкватэрных жылых дамах, частка жылых памяшканняў была аформленая на падстаўных асоб. «Кошт набытых абвінавачанымі кватэр быў значна ніжэй рынкавага, так як разлічваўся саўдзельнікамі злачынстваў зыходзячы з коштаў, якія дзейнічалі на момант уводу дома ў эксплуатацыю, а не на момант заключэння дамовы», - удакладнілі ў СК.

«У выніку злачынных дзеянняў вышэйзгаданых службовых асобаў бюджэт недаатрымаў звыш Br3,8 млрд, у ходзе следства кватэры вернутыя дзяржаве», - заявілі ў Следчым камітэце.