Парад для Колі

Дзіця без парадаў жыць не можа, яму ж трэба пагуляць у салдацікаў.

Такое меркаванне выказаў рэжысёр Юрый Хашчавацкі, каментуючы сайту charter97.org грандыёзны ваенны парад у Менску 3 ліпеня.

«Справа ў тым, што гэты парад робіцца для Колі. Бо дзіця без парадаў жыць не можа, яму ж трэба пагуляць у салдацікаў. Ну і сам Аляксандр Лукашэнка хоча прадэманстраваць гораду і свету, наколькі ён «крут». Пры гэтым удзел расейскіх дэсантнікаў паказвае, што нібыта «броня крепка и танки наши быстры». Да таго ж Коля атрымае вельмі вялікае задавальненне, бо на парадзе генералы яму будуць аддаваць гонар, а калі такое яшчэ адбудзецца?», - лічыць рэжысёр.

Ён падкрэсліў, што як малодшы, так і старэйшы Лукашэнкі з'яўляюцца дзецьмі.

«Я заўсёды кажу, што беларускі кіраўнік - гэта дзіця, якое затрымалася ў развіцці. Успомніце нашу дзіцячую мару пра тое, як было б выдатна апынуцца аднаму ў горадзе. Ідзеш па вуліцы, вакол нікога няма, заходзіш у любую краму і бярэш, што хочаш. Менавіта так і было падчас інаўгурацыі, калі ён разагнаў увесь горад і тым самым рэалізаваў сваю мару. Так што Лукашэнка дажыў да сівых валасоў, але застаўся дзіцем, прычым дзіцем злым, дрэнным і ілжывым», - перакананы Юрый Хашчавацкі.

Ён таксама адзначыў, што на думку Мінабароны выдаткі на парад неверагодна сціплыя.

«Сапраўды, а на забавы Колі ў Арменіі было выдаткавана яшчэ менш - усяго 500 даляраў. У гэтым плане беларускія ўлады вельмі сціплыя, так як трацяць на сваё задавальненне ўсяго толькі 0,2%, што выдзяляюцца на Узброеныя сілы. Бо 1,5 мільёна даляраў неяк шмат, а 0,2% ужо больш сціпла. Гаворачы адной фразай, гэта з'яўляецца рэалізацыяй клопату пра дзяцей за маленькія грошы. Але калі сур'ёзна, то ўсё гэта вельмі сумна. І мне цікава, як доўга наша грамадства будзе гэта цярпець», - падсумаваў Юрый Хашчавацкі.

Нагадаем, у ваенным парадзе 3 ліпеня будуць удзельнічаць больш трох тысяч вайскоўцаў і каля 150 адзінак баявой тэхнікі.

З-за рэпетыцыі парада ДАІ забараніла ўладальнікам аўтамабіляў паркаваць іх да 3 ліпеня на некаторых вуліцах. Таксама аўтааматараў просяць «захоўваць павышаную пільнасць».

Да вайсковага параду 3 ліпеня актыўна рыхтуюцца парадныя разлікі Мінабароны, МУС, МНС і ГПК. У ім таксама прымуць удзел прадстаўнікі Дзяржаўнага памежнага камітэта, Унутраных войскаў Міністэрства ўнутраных спраў, Міністэрства па надзвычайных сітуацыях, а таксама расейскія дэсантнікі.

Плануецца, што ў парадзе прымуць удзел каля трох тысяч чалавек - выхаванцы Менскага сувораўскага ваеннага вучылішча, курсанты Ваеннай акадэміі, ваенна-тэхнічнага факультэта БНТУ, вайскоўцы 120-й гвардзейскай асобнай механізаванай брыгады, 38-й і 103-й асобных мабільных брыгад, 86 - й брыгады сувязі, 56-га, 60-га, 74-га асобных палкоў сувязі, зводнай роты ганаровай варты, а таксама зводны аркестр Узброеных сіл.

Адзначым, што маштабны ваенны парад праводзіцца ў год, названы ўладамі «Годам беражлівасці».