Праваабаронцы: Сітуацыя з правамі чалавека ў Беларусі рэзка пагоршылася

Да канца 2014 года сітуацыя з правамі чалавека ў краіне рэзка пагоршылася.

Пра гэта заявіў намеснік старшыні закрытага ўладамі праваабарончага цэнтра «Вясна» Валянцін Стэфановіч у інтэрв'ю БелаПАН 10 снежня, у Міжнародны дзень правоў чалавека.

На працягу гэтага года, сказаў праваабаронца, у Беларусі захоўваўся пэўны баланс, калі «сітуацыя з правамі чалавека заставалася стабільна дрэннай, але без усплёскаў і хваляў рэпрэсій». Агулам, сказаў Стэфановіч, гэты год у гэтым плане быў падобны на 2013-ы.

«Але ў канцы года мы, на жаль, сталі сведкамі пагаршэння сітуацыі,- адзначыў ён. - Узрасла колькасць выпадкаў крымінальнага пераследу паводле палітычных матываў. Гэта і справу актывіста Юрыя Рубцова, прадпісанне аб высылцы праваабаронцы Алены Танкачовай, незразумелая гісторыя з затрыманнем журналіста Аляксандра Алесіна».

Сёння ў Беларусі застаюцца шасцёра палітвязняў, але з улікам таго, што грамадскі актывіст з Гомеля Юрый Рубцоў неўзабаве адправіцца адбываць паўтарагадовы тэрмін пакарання ва ўмовах абмежаванай свабоды, «палітвязняў, хутчэй за ўсё, стане сем».

Негатыўную тэндэнцыю ў галіне правоў чалавека Стэфановіч бачыць і ў «дыскусіі па барацьбе з дармаедствам». Ён нагадаў, што камітэт ААН у эканамічных, сацыяльных і культурных правах рэкамендаваў ураду Беларусі «ліквідаваць сістэму ЛПП, адысці ад рэпрэсіўнай практыкі стаўлення да людзей, пазбаўленых бацькоўскіх правоў, і гэтак далей». «Але, як мы бачым, краіна рухаецца абсалютна ў іншым кірунку ад гэтых рэкамендацый», - сказаў праваабаронца.

«З вуснаў вышэйшага кіраўніцтва краіны, юрыстаў, якія займаюць ключавыя пасады ў судовай сістэме, пракуратуры і МУС, гучаць прапановы аб турмах, дзе зняволеныя будуць прасіць аб смерці. Гэта ясна паказвае ўзровень іх прававой свядомасці, ступень рэалізацыі канстытуцыйных правоў грамадзян краіны, а таксама выканання Беларуссю міжнародных абавязацельстваў», - падсумаваў Стэфановіч.

Дзень правоў чалавека штогод паводоле пастановы ААН адзначаецца 10 снежня пачынаючы з 1950 года. У гэты дзень у 1948 годзе Генасамблея ААН прыняла Усеагульную дэкларацыю правоў чалавека.

У гэтым годзе Міжнародны дзень правоў чалавека праходзіць пад дэвізам «Правы чалавека 365 дзён у годзе». Напярэдадні гэтай даты генеральны сакратар ААН Пан Гі Мун заявіў, што заклікае дзяржавы «штодзённа на працягу ўсяго года выконваць іх абавязак у абароне правоў чалавека».

«Я заклікаю народы ўскладаць адказнасць на іх ўрады. І я заклікаю ўжываць адмысловыя меры абароны ў дачыненні да праваабаронцаў, якія адважна служаць нашай агульнай справе», - сказаў ён.