«Майдан замежных спраў» патрабуе апублікаваць вынікі перамоў у Менску

Дыпламаты звярнуліся з адпаведным запытам да кіраўніка Адміністрацыі Прэзідэнта Украіны.

«Майдан замежных спраў» просіць, улічваючы «значны грамадска-палітычны рэзананс, звязаны з вынікамі пасяджэнняў Трохбаковай кантактнай групы адносна сумесных крокаў, накіраваных на імплементацыю мірнага плана Пятра Парашэнкі і ініцыятыў прэзідэнта Расеі Уладзіміра Пуціна, праінфармаваць грамадскасць як адносна дэталей перамоў, так і ў дачыненні да вынікаў і іх дакументальнага замацавання», паведамляе УНІАН.

Так, у інфармацыйным запыце пастаўленыя наступныя пытанні:

- Ці былі прадстаўленыя паўнамоцтвы дэлегацыі Украіны на перамовы ў згаданым вышэй фармаце?

- Ці былі аформленыя ў адпаведнасці з дзейным заканадаўствам, і зацверджаныя адпаведныя дырэктывы дэлегацыі Украіны на перамовы?

- Ці быў утвораны і зацверджаны склад дэлегацыі Украіны на вышэйзгаданыя перамовы?

- Ці быў уключаны Руслан Дземчанка ў склад дадзенай дэлегацыі Украіны і хто менавіта прымаў адпаведнае рашэнне?

«Улічваючы, што згаданыя «менскія дамоўленасці» службовымі асобамі Адміністрацыі прэзідэнта Украіны прэзентуюцца ў якасці механізму імплементацыі мірнага плана прэзідэнта Украіны Пятра Парашэнкі, былі б удзячныя за тлумачэнні юрыдычнага статусу адпаведных пратаколаў у адпаведнасці з дзейным заканадаўствам (міжнародны дагавор, пагадненне, пратакол і т. п.)», - гаворыцца ў паведамленні.

Нагадаем, перамовы ў Менску прайшлі ўчора. Яны прадаўжаліся пяць гадзін. Афіцыйных вынікаў перамоў украінскі бок не паведаміў.