Нацбанк павялічыць стаўку рэфінансавання

Нацыянальны банк Беларусі не выключае павелічэння стаўкі рэфінансавання ў выпадку паскарэння інфляцыі.

Пра гэта паведамляе «Інтерфакс» са спасылкай на прэс-службу НББ.

«Дынаміка стаўкі рэфінансавання цягам года будзе залежаць ад макраэканамічнай сітуацыі, у першую чаргу - у знешнім гандлі і на валютным рынку, ад узроўню інфляцыі», - адзначана ў паведамленні рэгулятара.

«Безумоўна, пры замацаванні станоўчых тэндэнцый стаўка рэфінансавання і, адпаведна, узровень працэнтных ставак у эканоміцы будуць зніжацца», - адзначаецца ў паведамленні.

Разам з тым, гаворыцца там, у выпадку паскарэння інфляцыі ў параўнанні з чаканым узроўнем магчымае далейшае павышэнне стаўкі рэфінансавання.