Удзельнікаў акцыі памяці «Нябеснай сотні» ў Менску прысудзілі да арыштаў

Закрытыя працэсы прайшлі ў РУУС Цэнтральнага раёна сталіцы.

Як стала вядома charter97.org, першым быў асуджаны за акцыю памяці герояў «Нябеснай сотні» каардынатар грамадзянскай кампаніі «Еўрапейская Беларусь» Максім Вінярскі. Яго прысудзілі да 15 дзён арышту. Судовыя працэсы вяла суддзя Вікторыя Шабуня.

Таксама да 15 дзён адміністрацыйнага арышту быў прыгавораны адзін з лідараў прадпрымальніцкага руху Аляксандр Макаеў.

Актывіст Яўген Батура быў пакараны адміністрацыйным арыштам на 10 дзён за ўскладанне кветак да помніка Тараса Шаўчэнкі.

Яшчэ адзін удзельнік акцыі памяці герояў «Нябеснай сотні» Мікалай Колас быў асуджаны судом да 10 дзён арышту.

Актывістку і рэжысёра Вольгу Мікалайчык асудзілі на 5 дзён арышту.

22 студзеня ўвечары прыкладна 15 чалавек запалілі свечкі і ўсклалі кветкі да помніка Тарасу Шаўчэнку недалёка ад амбасады Украіны. Быў разгорнуты вялікі партрэт загінулага ва Украіне беларуса Міхаіла Жызнеўскага. Усе ўдзельнікі былі затрыманыя сілавікамі адразу пасля акцыі і дастаўленыя ў Цэнтральны РУУС сталіцы.

Пасля паўночы вызвалілі 4 чалавек - Ніну Багінскую, Дзмітрыя Захарэвіча, Юрыя Ваўчка, Валерыю Чарнаморцаву. У РУУС Цэнтральнага раёна засталіся да суда пяць затрыманых. Гэта каардынатар «Еўрапейскай Беларусі» Максім Вінярскі, актывісты Вольга Мікалайчык, Аляксандр Макаеў, Яўген Батура і Мікалай Колас.

Вызваленыя актывісты папрасілі прадстаўнікоў пасольства Украіны звярнуць увагу на тое, што ў міліцэйскім аўтобусе прадстаўнікі сілавых структур Беларусі вельмі здзекліва, ганебна, у абразлівай форме выказваліся пра Украіну і ўкраінцаў.