Лукашэнка: Статкевіч для мяне не палітык. Клянуся сваімі дзецьмі

Дыктатар абвясціў, што не мае намеру вызваляць былога кандыдата ў прэзідэнты Мікалая Статкевіча.

"Статкевіч для мяне не палітык. Клянуся сваімі дзецьмі. Не трэба папракаць мяне, што ён для мяне палітычны канкурэнт. Ну, ён жа саступіў на выбарах", - заявіў у чацвер у Менску на прэс-канферэнцыі Лукашэнка.

"Вось што людзям запомнілася пра Статкевіча? Я не памятаю ніякай ў яго канструктыўнай праграмы. Не рабіце яго нейкай значнай фігурай", - працягнуў ён.

Лукашэнка падкрэсліў, што "ў нас ёсць усе запісы, усе кадры, калі ён пайшоў на штурм". "Гэта ж злачынства ў кожнай дзяржаве. Добра, праехалі. Не трэба казаць, што ён палітвязень - ён учыніў злачынства", - сказаў дыктатар.

"Закон ёсць закон. Вызваліць Статкевіча - я потым палову калоніі, напэўна, павінен амніставаць", - адзначыў дыктатар.